ມາຮູ້ຈັກ ອີກແຫລ່ງທ່ອງທ່ຽວຫນຶ່ງ ຖ້ຳເຈົ້າອະນຸວົງ ແຂວງໄຊສົມບູນ

    0
    67

    ຖໍ້າເຈົ້າອະນຸວົງ ເປັນແຫລ່ງທ່ອງທ່ຽວຫນຶ່ງທີ່ມີຄວາມສວຍງາມທາງດ້ານທໍາມະຊາດ ແລະ ມີຊື່ສຽງທາງດ້ານປະຫວັດສາດການຕໍ່ສູ້ ຂອງເຈົ້າອະນຸວົງ ກະສັດອົງ ສຸດທ້າຍຂອງອານາຈັກລ້ານຊ້າງ, ເປັນແຫລ່ງທ່ອງທ່ຽວທີ່ໄດ້ຮັບຄວາມນິຍົມສູງສຸດ ຂອງນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ເດີນທາງເຂົ້າມາຢ້ຽມຢາມແຂວງ ໄຊສົມບູນ.

    ຖ້ໍາດັ່ງກ່າວ ຕັ້ງຢູ່ບ້ານພູຫົວຊ້າງ ເມືອງອະນຸວົງ ໄປທາງທິດເຫນືອປະມານ 4 ກິໂລແມັດ (ທາງຂຶ້ນພູເບ້ຍ) ເຊິ່ງມີເນື້ອທີ່ປະມານ 10 ເຮັກຕາ ຫລື ເທົ່າກັບ 96,000 ຕາແມັດ, ຖ້ໍານີ້ຕັ້ງຢູ່ຕີນຜາສູງຊັນປະມານ 200 ແມັດ, ດ້ານຫນ້າຂອງຖໍ້າມີ ສາຍນ້ໍາຈັ່ງໄຫລຜ່ານ, ດ້ານຫລັງ ແລະ ດ້ານຂ້າງເບື້ອງທິດຕາເວັນຕົກ ຖືກອ້ອມຮອບ ໄປດ້ວຍພູນ້ອຍພູໃຫຍ່ ແລະ ປ່າໄມ້ດົກຫນາທີ່ຂຽວງາມຕະຫລອດປີ ເຊິ່ງບົ່ງບອກ ເຖິງຄວາມອຸດົມສົມບູນ ຂອງຊີວະນາໆພືດພັນ ໃນສວນອຸທິຍານແຫ່ງນີ້, ດ້ານຂ້າງທາງທິດເຫນືອຕິດກັບຕີນພູເບ້ຍ

    ຖໍ້າເຈົ້າອະນຸວົງເປັນຖ້ໍາຫີນປູນທີ່ເກີດຈາກການສຽດ ເຊາະຂອງນໍ້າພາຍໃນຖ້ໍາປະກອບມີນົມຜາ, ຫີນງອກຫີນຍ້ອຍ ຫລາຍຮູບຫລາຍຊົງທີ່ ງົດງາມ ຕາມການຈິນຕະນາການຂອງຜູ່ເບິ່ງ, ນອກນັ້ນ ຍັງມີຫີນແກ້ວສີຂາວ ເຫລື້ອມຍິບຍັບ ຄ້າຍຄືເພັດພອຍກ້ອນນ້ອຍກ້ອນໃຫຍ່ ຫ້ອຍປະດັບປະດາ ຢູ່ຕາມ ຜາຫີນ ປຽບດັ່ງດອກໄຟແສງສີ ເມື່ອມີແສງປະກາຍໄຟສະທ້ອນໃສ່ຢ່າງສວຍງາມ. ຖ້ໍານີ້ປະກອບມີສອງ 2 ຖໍ້າຢູ່ໃກ້ຄຽງກັນ: ຖໍ້າທີ 1 ປາກຖໍ້າກວ້າງ 5 ແມັດ, ສູງ 3,5 ແມັດ;ປະກອບມີ 2 ຫ້ອງ, ຫ້ອງທີ່ 1 ຫ່າງຈາກປາກຖ້ໍາປະມານ 15 ແລະ ມີ ຄວາມເລິກປະ ມານ 50 ແມັດ ແລະ ຫ້ອງທີ 2 ເລິກເຂົ້າໄປປະມານ 300 ແມັດ, ສາມາດບັນຈຸຄົນໄດ້ປະມານ 100 ຄົນ, ເຊິ່ງຊາວ ບ້ານເຊື່ອກັນວ່າເປັນບ່ອນພັກເຊົາ ຂອງເຈົ້າອະນຸວົງ ພ້ອມດ້ວຍອົງຄະລັກ ແລະ ຖ້ໍາທີ 2 ຕັ້ງຫ່າງຈາກຖ້ໍາທີ 1 ປະມານ 15 ແມັດ ປາກຖ້ໍາກວ້າງ 7 ແມັດ, ສູງ 4 ແມັດ, ເລິກເຂົ້າໄປປະມານ 30 ແມັດ, ສາມາດບັນຈຸຄົນໄດ້ປະ ມານ 50 ຄົນ ແລະ ເຊື່ອກັນວ່າ ເປັນສະຖານທີ່ພັກເຊົາຂອງ ກໍາລັງທະຫານຂອງເຈົ້າອະນຸວົງ.

    ຖໍ້າເຈົ້າອະນຸວົງ ໃນເມື່ອກ່ອນມີຊື່ວ່າ “ຖໍ້າຜາຊຽງທອງ” ແຕ່ເນື່ອງຈາກຖໍ້າ ແຫ່ງນີ້ ມີປະຫວັດກ່ຽວພັນກັບການຕໍ່ສູ້ ຂອງເຈົ້າອະນຸວົງໃນປີ ຄ.ສ 1829 ທີ່ໄດ້ ເຮັດສົງຄາມຕ້ານການຮຸກຮ້ານ ຂອງພວກສະຫຍາມຢູ່ແຂວງຊຽງຂວາງໃນເວລານັ້ນ ເພື່ອຫວັງກອບກູ້ເອກະລາດ ໃຫ້ຫລຸດພົ້ນອອກຈາກການເປັນເມືອງຂຶ້ນຂອງ ສະຫຍາມ, ແຕ່ເຫັນວ່າ ສູ້ກັບສັດຕູບໍ່ໄດ້ ຍ້ອນວ່າກໍາລັງຂອງສັດຕູມີຫລາຍກວ່າ ແລະ ມີອາວຸດທີ່ທັນສະໄຫມກວ່າ, ກອງທັບເຈົ້າອະນຸວົງຈຶ່ງໄດ້ຖອຍທັບຈາກຊຽງ ຂວາງ ມາຈ້ງທັບຢູ່ແຄມນ້ໍາເພື່ອດັກສະກັດຕີສັດຕູ ເຈົ້າອະນຸວົງ ຈຶ່ງໄດ້ໃສ່ຊື່ເຂດນີ້ວ່າ “ເມືອງຈັ່ງນ້ໍາ”.

    .

    ແຕ່ພວກທະຫານສະຫຍາມ ໄດ້ໄລ່ຕິດຕາມມາ ຈຶ່ງໄດ້ມີການຕໍ່ສູ້ກັນ ຢ່າງດຸເດືອດ ແຕ່ກໍາລັງຂອງຝ່າຍສັດຕູມີຫລາຍກວ່າ, ກອງທັບເຈົ້າອະນຸວົງຈຶ່ງຖອຍ ທັບຈາກເມືອງຈັ່ງນ້ໍາໄປຕັ້ງທັບຢູ່ເມືອງອ້ອມ, ຕໍ່ມາເຈົ້ານ້ອຍເມືອງພວນ ພ້ອມກັບທະຫານສະຫຍາມ ກໍໄລ່ຕິດຕາມໄປປິດລ້ອມອີກ ເຈົ້າອະນຸວົງ ຈຶ່ງຕັ້ງຊື່ເຂດນີ້ວ່າ: ເມືອງອ້ອມ (ເມືອງອອມໃນປະຈຸບັນ), ກອງທັບເຈົ້າອະນຸວົງ ໄດ້ຖອຍທັບຈາກເມືອງ ອອມ ກັບຄືນມາຕັ້ງທັບຢູ່ເມືອງຈັ່ງນ້ໍາອີກເທື່ອຫນຶ່ງ ຈຶ່ງປ່ຽນຊື່ເຂດນີ້ມາເປັນ “ເມືອງຈັ່ງບົກ” ເພື່ອຕີຕ້ານກັບທະຫານສະຫຍາມ ແລະ ທະຫານເຈົ້ານ້ອຍເມືອງພວນ, ໃນ ເວລາທີ່ເຈົ້າອະນຸວົງ ແລະ ທະຫານມາຮອດເຂດນີ້ທໍາອິດ ເພີ່ນໄດ້ເຂົ້າໄປຊ້ອນຕົວຢູ່ ຖ້ໍາຜາຊຽງທອງ ຫລື ຖ້ໍາເຈົ້າອະນຸວົງຢູ່ຕໍ່ມາໄດ້ໄລຍະຫນຶ່ງ ຮູ້ວ່າເສຍຄວາມລັບແລ້ວ ເຈົ້າອະນຸວົງຈຶ່ງແບ່ງກໍາລັງອອກເປັນສອງຈຸຄື: ຈຸທີຫນຶ່ງປະຈໍາຢູ່ຖ້ໍາຄືເກົ່າ ແລະ ຈຸທີ ສອງຕິດຕາມເຈົ້າອະນຸວົງມາຕັ້ງທັບຢູ່ຜາພະເຈົ້າ, ຕໍ່ມາກໍເສຍຄວາມລັບອີກ ເຈົ້າ , ອະນຸວົງ ຈຶ່ງໄດ້ນໍາພາກໍາລັງຍ້າຍອອກຈາກເຂດນີ້. ດັ່ງນັ້ນ ຜູ່ເຖົ້າຜູ່ແກ່ຈຶ່ງໄດ້ປ່ຽນຊື່ ຖ້ໍາຜາຊຽງທອງແຫ່ງນີ້ມາເປັນ “ຖ້ໍາເຈົ້າອະນຸວົງ” ຈົນເຖິງທຸກວັນນີ້.
    ຈາກ: Lao Youth Radio FM 90.0 Mhz

    LEAVE A REPLY

    Please enter your comment!
    Please enter your name here