ເປັນຜູ້ນຳ ແລະເປັນແບບຢ່າງທີ່ດີ ຈັດກອງປະຊຸມສົນທະນາຢູ່ທ່າມກາງຊົນນະບົດ

0
108

ຈັດກອງປະຊຸມສົນທະນາຢູ່ທ່າມກາງຊົນນະບົດຂປລ. ວິທະຍຸສາກົນ ແຫ່ງປະເທດຈີນ (CRI) ໄດ້ລາຍງານວ່າ: ຫວ່າງມໍ່ໆມານີ້, ທ່ານ ສີຈິ້ນຜິງ ປະທານປະເທດຈີນ ໄດ້ເດີນທາງໄປສຳຫລວດກວດກາຢູ່ບ້ານເໝົານ້າ ຕາແສງສຸຍມານ ທີ່ຢູ່ຕີນພູອູຈື (ພູຫ້ານິ້ວ) ແຂວງໄຫຫລຳ ຂອງຈີນ. ຢູ່ທີ່ສາລາຂອງບ້ານ, ທ່ານ ສີຈິ້ນຜິງ ກັບ ພະນັກງານຮາກຖານ, ຜູ້ຕາງໜ້າຊາວບ້ານ ໄດ້ນັ່ງໃກ້ຊິດ ແລະ ສົນທະນາກັນຢ່າງສະໜິດສະໜົມ.

ຜູ້ທີ່ນັ່ງຢູ່ຄຽງຂ້າງທ່ານ ສີຈິ້ນຜິງ ມີເລຂາທີໜຶ່ງປະຈຳບ້ານ, ຫົວໜ້າໜ່ວຍງານພັດທະນາຊົນນະບົດຂັ້ນຕາແສງ, ເລຂາໜ່ວຍພັກບ້ານ, ສະມາຊິກພັກຜູ້ອາວຸໂສ, ຜູ້ນຳໜ້າສ້າງຄວາມຮັ່ງມີ, ນັກສຶກສາທີ່ກັບເມືອຊົນນະບົດເພື່ອສ້າງທຸລະກິດ, ຜູ້ປົກປັກຮັກສາປ່າໄມ້, ຜູ້ສືບທອດມໍລະດົກວັດທະນະທຳ ນາມມະທຳ ແລະອື່ນໆ.

ເມື່ອເຫັນພາບນີ້, ໄດ້ເຮັດໃຫ້ຄົນຫວນຄືນເຖິງສະພາບທີ່ທ່ານ ສີຈິ້ນຜິງ ສຳຫລວດກວດກາວຽກງານຢູ່ບ້ານ 18 ຖ້ຳກິ່ງ ແຂວງຊ່ຽງຊີ່ ແຂວງຫູນານ ເມື່ອວັນທີ 3 ພະຈິກ 2013, ໃນເວລານັ້ນ ທ່ານ ສີຈິ້ນຜິງ ໄດ້ນັ່ງສົນທະນາກັບພະນັກງານບ້ານ ແລະ ຊາວບ້ານຢ່າງໃກ້ຊິດເຊັ່ນກັນ. ໃນມື້ນັ້ນ, ຢູ່ເດີ່ນບ້ານຕໍ່ໜ້າເຮືອນຊາວບ້ານ, ທ່ານ ສີຈິ້ນຜິງ ໄດ້ສະເໜີທັດສະນະຫລຸດຜ່ອນຄວາມທຸກຍາກຢ່າງຖືກຕ້ອງກັບເປົ້າໝາຍທີ່ແນ່ນອນເປັນຄັ້ງທຳອິດຢູ່ຕໍ່ໜ້າປະຊາຊົນທີ່ນັ່ງຢູ່ອ້ອມຂ້າງ, ເຊິ່ງໄດ້ຊີ້ແຈງທິດທາງໃຫ້ແກ່ວຽກງານລຶບລ້າງຄວາມທຸກຍາກຂອງຈີນ.

ໃນຊຸມປີ 1980, ກໍເຄີຍມີຮູບເກົ່າທີ່ເປັນພາບຄ້າຍຄືກັນ, ທ່ານ ສີຈິ້ນຜິງ ໃນໄວໜຸ່ມທີ່ເປັນເລຂາຄະນະພັກເມືອງເຈີ້ງຕິ້ງ ໄດ້ຕັ້ງໂຕະ ຊົ່ວຄາວໜ່ວຍໜຶ່ງຢູ່ແຄມຖະໜົນ , ເພື່ອຮັບຟັງຄວາມຄິດເຫັນຂອງປະຊາຊົນ. ການໄດ້ຮັບຟັງຄວາມຕ້ອງການຂອງປະຊາຊົນ ແລະ ຂໍຄວາມເຫັນນຳປະຊາຊົນ, ເຊິ່ງແບບແຜນການປົກຄອງບໍລິຫານແນວນີ້ໄດ້ດຳເນີນຢ່າງສືບເນື່ອງມາຮອດປັດຈຸບັນນີ້; ຢູ່ຕາມແນວໜ້າຮາກຖານ ແລະ ຕາມທົ່ງນາຊົນນະບົດ, ກໍໄດ້ຍຶດໝັ້ນປະຕິບັດວຽກງານຕາມວິທີແບບນີ້ຢ່າງສະເໝີຕົ້ນສະເໝີປາຍ.

ຢູ່ລຸ່ມຕຶກນ້ອຍ ຢູ່ໜ້າເຮືອນ ແລະ ເດີ່ນບ້ານໜ້າເຮືອນປະຊາຊົນໃນເຂດຊົນນະບົດ, ທ່ານ ສີຈິ້ນຜິງ ໄດ້ລົມເລື່ອງຊີວິດປະຈຳວັນກັບຊາວບ້ານ ແລະ ຮັບຟັງຄວາມໃນໃຈຂອງປະຊາຊົນ. ກອງປະຊຸມສົນທະນາແມ່ນຈັດຢູ່ຕາມທົ່ງນາ, ໂດຍໄດ້ເຂົ້າສູ່ຈິດໃຈຂອງປະຊາຊົນຢ່າງແທ້ຈິງ. ເຊັ່ນດຽວກັບການສຳຫລວດກວດກາວຽກງານຢູ່ບ້ານເໝົານ້າ ຄັ້ງນີ້, ທ່ານ ສີຈິ້ນຜິງ ເວົ້າສູ່ປະຊາຊົນຟັງວ່າ: “ສິ່ງທີ່ພັກກອມມູນິດຈີນ ເອົາໃຈໃສ່ຄືໃຫ້ປະຊາຊົນບັນດາເຜົ່າທົ່ວປະເທດມີຊີວິດການເປັນຢູ່ນັບມື້ນັບດີຂຶ້ນ. ພັກບໍ່ມີຜົນປະໂຫຍດສ່ວນຕົວ, ພະນັກງານການນຳຂອງພັກຍິ່ງບໍ່ຄວນມີຜົນປະໂຫຍດສ່ວນຕົວ, ຕ້ອງຍຶດໝັ້ນອຸດົມຄະຕິພື້ນຖານຂອງພັກ ແລະ ແນວທາງປະຊາຊົນຂອງພັກ, ນຳໃຊ້ກຳລັງວັງຊາທັງໝົດເຂົ້າໃນວຽກງານທີ່ເຮັດໃຫ້ປະຊາຊົນມີຊີວິດການເປັນຢູ່ທີ່ດີ.”