ແມ່ລ້ຽງລູກມາ 6 ຄົນແຕ່ໜີໃຜໜີມັນຕ້ອງລຳບາກຍາມ 80

    0
    88

    ສົມເພິ່ນວ່າ ສຳລັບແມ່ແລ້ວເງິນແມ່ຄືເງິນລູກ, ເຮືອນແມ່ຄືເຮືອນລູກ ທຸກຢ່າງຂອງແມ່ຄືລູກ ແຕ່ສຳລັບລູກແລ້ວ ເຮືອນລູກບໍ່ແມ່ນເຮືອນແມ່ ເງິນລູກບໍແມ່ນຂອງແມ່ ແມ່ຈະໄດ້ແຕ່ສ່ວນທີ່ລູກໃຫ້ ແລ້ວແມ່ເດ ໃຫ້ທຸກຢ່າງແກ່ລູກແມ່ນແຕ່ເລືອດເນື້ອ ເວົ້າມາລະໜ້າເສົ້າ ຖ້າລ້ຽງລູກມາຢ່າງຖະໜຸຖະໜອມສຸດທ້າຍເປັນແບບແມ່ຕູ້ນີ້ ບໍ່ມີກະບໍເປັນຫຍັງນໍ!

    ເລື່ອງລາວນີ້ບໍ່ແມ່ນເກີດຂຶ້ນຢູ່ບ້ານເຮົາ ແຕ່ຢາກເອົາມາລົງ ເພື່ອເປັນວິທະຍາທານໃຫ້ກັບຫຼາຍໆຄົນໄດ້ທຳໃຈໃນການລ້ຽງລູກ ແລະໃຫ້ລູກໆໄດ້ຄິດຫາຜູ້ໃຫ້ກຳເນີດ ແລະລ້ຽງດູລູກໃຫ້ເຕີບໃຫຍ່ຕົນປີກກ້າຂາແຂງສາມາດລ້ຽງກຸ້ມຕົນເອງໄດ້ຄວນຫຼຽວແລເພິ່ນ.

    ນີ້ເປັນເລື່ອງໜ້າເສົ້າແຮງສຳລັບແມ່ຕູ້ໄວ 82 ປີໃນເມືອງໄທ ຕາມຂ່າວລາຍງານວ່າ ແມ່ຕູ້ຄົນນີ້ຢູ່ຈັງຫວັດສຸຣິນ ດຳລົງຊີວິດຢູ່ຕາມລຳພັງຢ່າງຍາກລຳບາກ ແຖມຍັງຕ້ອງລ້ຽງຫຼານອີກສອງຄົນທີ່ລູກເອົາມາຖີ້ມໄວ້ໃຫ້.

    ດີແຕ່ບ້ານເຂົາຍັງມີເງິນຄົນຊະລາເດືອນລະ 800 ບາດ ແມ່ຕູ້ກໍອາໄສເງິນສ່ວນນີ້ມາປະທັງຊີວິດ ສ່ວນລູກໆເກີດອອກມາທັງໝົດ  6 ຄົນບໍ່ມີໃຜມາເບິ່ງແມ່ເລີຍ ຕ້ອງຢູ່ພຽງຄົນດຽວໃຫ້ເຮືອນທີ່ເກົ່າແກ່ຊຸດໂຊມ.ມີພຽງປ້າຍໄມ້ອັດຂອງຊາວບ້ານແມ່ຕູ້ໄປເກັບມາເປັນຝາເຮືອນພລບັງແດດບັງລົມເທົ່ານັ້ນ.

    ສ່ວນຫຼັງຄາເປັນສັງກະສີເກົ່າໆ ພື້ນເຮືອນ ແລະຕົວເຮືອນເປັນເສດໄມ້ພຸພັງ ທີ່ສາມາດຍຸບລົງຕອນໃດກໍ່ໄດ້ ພາຍໃນຫ້ອງນອນມີພຽງມຸ້ງຜືນເກົ່າໆ 1 ດາງ ແລະຜ້າຫົ່ມຂາດໆພໍໄດ້ຫຼັບນອນ.

    ບໍ່ພໍເທົ່ານັ້ນລູກຂອງແມ່ຕູ້ຍັງເອົາຫຼານໄວ 4 ປີ ແລະ 6 ປີມາ ຖີ້ມໃຫ້ແມ່ຕູ້ລ້ຽງ ແລະບໍ່ເຄີຍສົນໃຈສົ່ງເງິນມາລ້ຽງດູເລີຍແຕ່ຢ່າງໃດ.

    ແນວໃດກໍ່ຕາມ ມີຄຳເວົ້າປະໄວ້ໃຫ້ທຸກຄົນຄິດ ແລະຢາກໃຫ້ນຳໄປຈັດຕັ້ງປະຕິບັດວ່າ ຄົນສອງຄົນທີ່ເຮົາຕ້ອງຮັບຜິດຊອບນັ້ນຄື ຄົນທີ່ໃຫ້ກຳເຮີດເຮົາມາ ແລະຄົນທີ່ເຮົາລ້ຽງກຳເນີດ ສະນັ້ນ ຢ່າປະໃຫ້ບໍ່ມີແມແລ້ວຈິ່ງເຮັດບຸນໄປຫາເພິ່ນ ຈົ່ງຮັກເພິ່ນຍາມຍັງມີຊີວິດຢູ່ເຖີດ!!!

    LEAVE A REPLY

    Please enter your comment!
    Please enter your name here