ພົບພະນັກງານລັດລະເມີດ ແລະ ມີສ່ວນຮ່ວມພົວພັນໃນການປະຕິບັດຄຳສັ່ງເລກທີ 15/ນຍ ທັງໝົດ 1.119 ຄົນ

0
77

ວັນທີ 11 ເມສາ 2022 ທີ່ແຂວງຈໍາປາສັກ, ອົງການກວດກາແຫ່ງລັດ ໄດ້ ຈັດກອງປະຊຸມວຽກງານກວດກາທົ່ວປະເທດ ຄັ້ງທີ IV ໂດຍເປັນປະທານ ຂອງສະຫາຍ ຄຳພັນ ພົມມະທັດ ກຳມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ, ມີສະຫາຍ ວິໄລວົງ ບຸດດາຄຳ ກຳມະ ການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຈໍາປາສັກ ພ້ອມດ້ວຍເລຂາພັກ, ຄະນະປະຈໍາພັກ, ປະທານກວດກາແຂວງຈໍາປາສັກ, ສະຫວັນນະເຂດ, ສາລະວັນ, ເຊກອງ ແລະ ອັດຕະປື ເຂົ້າຮ່ວມ.

ສະຫາຍ ດາວບົວລະພາ ບາວົງເພັດ ຮອງປະທານຄະນະກວດກາສູນກາງພັກ ໄດ້ໃຫ້ຮູ້ວ່າ: ການເຄື່ອນໄຫວວຽກງານກວດກາແຕ່ປີ 2016 ເຖິງປັດຈຸບັນ ໄດ້ມີການລົງວິໄນໃນລະດັບຕ່າງໆ ຕໍ່ການຈັດຕັ້ງພັກ ແລະ ສະມາຊິກພັກຄື: ກ່າວເຕືອນຄວາມຜິດ 9 ໜ່ວຍພັກ, ສະມາຊິກພັກຖືກລົງວິໄນ 3.690 ເທື່ອຄົນ, ຍິງ 440 ຄົນ. ໃນນີ້ ຕິຕຽນ 26 ຄົນ, ກ່າວເຕືອນຄວາມຜິດ 753 ຄົນ, ໂຈະການຮ່ວມຊີວິດພັກ 742 ຄົນ, ປົດຕໍາແໜ່ງ 150 ຄົນ ແລະ ເອົາອອກຈາກພັກ 2.019 ຄົນ. ສ່ວນວຽກງານກວດກາລັດ ແມ່ນໄດ້ສົມທົບກັບຄະນະນໍາກະຊວງ-ອົງການ, ນະຄອນຫລວງ, ແຂວງ

ແລະ ຄະນະກວດກາແຕ່ລະຂັ້ນດໍາເນີນການຕິດຕາມ, ກວດກາປົກກະຕິ, ກວດກາຕາມຄຳສັ່ງ, ຕາມການສະເໜີຂອງພົນລະ ເມືອງ, ໃນນັ້ນອັນພົ້ນເດັ່ນ ກໍແມ່ນ ກວດກາບັນຫາໂຄງການລົງທຶນກໍ່ສ້າງພື້ນຖານໂຄງລ່າງ, ການຄຸ້ມຄອງນໍາໃຊ້ທີ່ດິນ, ການຂຸດຄົ້ນ ແລະ ທຸລະກິດໄມ້, ການສຳຫລວດຂຸດຄົ້ນແຮ່ທາດ ແລະ ອື່ນໆ, ເຊິ່ງສາມາດກວດກາໄດ້ທັງໝົດ 4.185 ເປົ້າໝາຍ, ພົບເຫັນຜົນເສຍຫາຍທັງໝົດ 8.370 ຕື້ກີບ, ເປັນເງິນໂດລາ 50,22 ລ້ານໂດລາ ແລະ ເງິນບາດ 36,89 ລ້ານບາດ. ໃນເບື້ອງຕົ້ນສາມາດເກັບກູ້ຄືນມາໃຫ້ລັດໄດ້ 1.782 ຕື້ກີບ, ເປັນເງິນໂດລາ 3,55 ລ້ານໂດລາ, ເງິນບາດ 11,16 ລ້ານບາດ.

ສະພາບໃນການກວດກາ ໂຄງການລົງທຶນຂອງລັດ ຕາມແຈ້ງການ ຂອງຫ້ອງວ່າ ການສຳນັກງານນາຍົກລັດຖະມົນຕີ ສະບັບເລກທີ 130/ຫສນຍ, ສໍາເລັດແລ້ວ 2.004 ໂຄງການ ໃນຈໍານວນ 5.542 ໂຄງການ; ໄດ້ດໍາເນີນການຈັດຕັ້ງປະຕິບັດຄຳສັ່ງເລກທີ 15/ນຍ, ພົບເຫັນການລະເມີດ ແລະ ຜູ້ມີສ່ວນຮ່ວມພົວພັນ 1.119 ຄົນ, ໃນນີ້ມີພະນັກງານລັດ 127 ຄົນ, ຜູ້ປະກອບການ 246 ຄົນ, ປະຊາຊົນ 746 ຄົນ, ຢຶດໄມ້ໄດ້ 11.351,75 ແມັດກ້ອນ ແລະ 33,17 ໂຕນ, ປັບໃໝ 22,28 ຕື້ກີບ, ພົບເຫັນການຄ້າງມອບພັນທະ ແລະ ຄ້າງຊໍາລະຄ່າໄມ້ໃຫ້ລັດ 121.120.861 ແມັດກ້ອນ ມູນຄ່າ 66,57 ຕື້ກີບ ແລະ 4,87 ລ້ານໂດລາ.

ໃນໄລຍະຜ່ານມາໄດ້ດຳເນີນການສືບສວນ-ສອບສວນ ຄະດີກ່ຽວຂອງກັບການສໍ້ລາດບັງຫລວງທັງໝົດ 842 ເປົ້າໝາຍ, ໃນນັ້ນມີພະນັກງານລັດ 363 ຄົນ, ພະນັກງານລັດວິສາຫາກິດ 364 ຄົນ, ບຸກຄົນທົ່ວໄປທີ່ກ່ຽວຂ້ອງ 115 ຄົນ, ສາມາດສະຫລຸບຄະດີສົ່ງໄອຍະການ 154 ຄົນ ໃນນີ້ພະນັກງານລັດ 79 ຄົນ, ພະນັກ ງານລັດວິສາຫະກິດ 41 ຄົນ, ບຸກຄົນທີກ່ຽວຂ້ອງ 34 ຄົນ, ສານຕັດສິນ

ແລ້ວ 100 ຄົນ ໃນນັ້ນ ພະນັກງານລັດ 47 ຄົນ, ພະນັກງານລັດວິສາຫະກິດ 28 ຄົນ, ບຸກຄົນທີ່ກ່ຽວຂ້ອງ 25 ຄົນ, ແກ້ໄຂທາງບໍລິຫານໄດ້ 652 ຄົນ, ໃນນັ້ນພະນັກງານລັດ 265 ຄົນ, ວິສາຫະກິດ 313 ຄົນ, ບຸກຄົນກ່ຽວຂ້ອງ 72 ຄົນ, ພົບເຫັນຜົນເສຍຫາຍທັງໝົດ 747.512 ຕື້ກວ່າກີບ, ເງິນບາດ 426.793 ລ້ານກວ່າບາດ, ເງິນໂດລາ 13.814 ລ້ານກວ່າໂດລາ, ໃນເບື້ອງຕົ້ນສາມາດເກັບກູ້ຄືນໄດ້ 378.807 ຕື້ກວ່າກີບ, 30.604 ລ້ານກວ່າບາດ, 11.097 ລ້ານໂດລາ.

ໂອກາດດຽວກັນນີ້, ສະຫາຍ ຄຳພັນ ພົມມະທັດ ໄດ້ໃຫ້ກຽດໂອ້ລົມຕໍ່ກອງປະຊຸມ ໂດຍໄດ້ເນັ້ນໜັກບາງຈຸດຕົ້ນຕໍ ໃນການເຄື່ອນໄຫວວຽກງານກວດກາໃນຊຸມປີຕໍ່ໜ້າ ເປັນ ຕົ້ນ ສ້າງຄວາມເຂົ້າໃຈຖືກຕ້ອງກ່ຽວກັບທີ່ຕັ້ງ, ບົດບາດຂອງວຽກງານກວດກາໃນສະພາບການປັດຈຸບັນ ແລະ ຄວາມເລັ່ງທວງຕົວຈິງຕໍ່ຄະນະພັກແຕ່ລະຂັ້ນ; ປັບປຸງພາລະບົດບາດ ແລະ ສາຍພົວພັນຂອງອົງການກວດກາຂອງພັກ-ລັດ ກັບບັນດາພາກສ່ວນທີ່ກ່ຽວຂ້ອງ; ປັບປຸງຂອດໃນກົງຈັກການຈັດຕັ້ງ ແລະ ແບບແຜນເຮັດວຽກ ຂອງຄະນະກວດກາພັກ-ອົງການກວດກາລັດ ແຕ່ລະຂັ້ນ; ກ່ຽວກັບການແກ້ໄຂບັນຫາພະນັກງານ ໃຫ້ອົງການກວດ ກາພັກ-ລັດແຕ່ລະຂັ້ນ.