ການກໍ່ສ້າງເຮືອນຖາວອນ ໃຫ້ປະຊາຊົນບ້ານດົງບາກໃໝ່ຫີນຄໍາ ເມືອງສະໜາມໄຊ ສຳເລັດ 100 % ຈຳນວນ 322 ຫລັງ

0
78

ຂປລ.ເມື່ອບໍ່ດົນມານີ້, ທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ(ຖວທ) ໄດ້ເຄື່ອນໄຫວຢ້ຽມຢາມ ເຮັດວຽກຢູ່ ບ້ານດົງບາກໃໝ່ຫີນຄໍາ ເມືອງສະໜາມໄຊ ແຂວງອັດຕະປື, ໃຫ້ກຽດຕ້ອນຂອງທ່ານ ລືໄຊ ວຽງພະຈັນ ນາຍບ້ານດົງບາກໃໝ່ຫີນຄຳ, ມີທ່ານ ຈັນທະພອນ ຈ່ອຍຄໍາລຽນ ຫົວໜ້າຫ້ອງການຖະແຫລງຂ່າວ, ວັດທະນະທໍາ ແລະ ທ່ອງທ່ຽວເມືອງ ຕະຫລອດຮອດພໍ່ແມ່ປະຊາຊົນເຂົ້າຮ່ວມ.

ທ່ານ ລືໄຊ ວຽງພະຈັນ ນາຍບ້ານດົງບາກໃໝ່ຫີນຄຳ ໄດ້ລາຍງານສະພາບລວມຈຸດພິເສດ ແລະ ການ ພັດທະນາເສດຖະກິດ – ສັງຄົມຂອງບ້ານ ແລະ ຜ່ານທິດທາງແຜນ ການໃນ 3 ເດືອນຕໍ່ໜ້າ. ບ້ານດົງບາກໃໝ່ຫີນຄໍາ ມີ 2 ຄຸ້ມ, ມີ 30 ໜ່ວຍ, ມີປະຊາຊົນ ຢູ່ຮ່ວມກັນທັງໝົດ 2 ເຜົ່າຄື: ເຜົ່າລາວ ແລະ ເຜົ່າໂອຍ, ມີພົນລະເມືອງທັງໝົດ 1.949 ຄົນ, ຍິງ 935 ຄົນ, ມີ 408 ຄົວເຮືອນ, ມີ 509 ຄອບຄົວໃນນັ້ນ ຄອບຄົວພົ້ນທຸກມີ 380 ຄອບຄົວ, ຈຳນວນພົນ 1.552 ຄົນ, ຍິງ 748 ຄົນ, ຄອບຄົວກຸ້ມກິນ 101 ຄອບ ຄົວ, ມີຄອບຄົວທຸກຍາກ 28 ຄອບຄົວ, ອາຊີບຕົ້ນຕໍຂອງປະຊາຊົນແມ່ນເຮັດນາປູກເຂົ້າເປັນຫລັກ, ເຮັດສວນປູກພືດ, ລ້ຽງສັດ ແລະ ຄ້າຂາຍເປັນອາຊີບສຳຮອງ. ມາຮອດປະຈຸບັນ ການກໍ່ສ້າງເຮືອນຖາວອນມີຈຳ ນວນທັງໝົດ 403 ຫລັງ , ໃນນີ້ ການກໍ່ສ້າງສຳເລັດ 100 % ມີ 322 ຫລັງ.

ໂອກາດດັ່ງກ່າວ, ທ່ານນາງ ສວນສະຫວັນ ວິຍະເກດໄດ້ໃຫ້ກຽດໂອ້ລົມ ຕໍ່ຄະນະພັກ,ອຳນາດປົກຄອງບ້ານກໍ່ຄື:ພໍ່ແມ່ປະຊາຊົນພາຍໃນບ້ານ ເພື່ອເປັນທິດຊີ້ນໍາໃຫ້ວຽກ ງານຂອງບ້ານມີການຫັນປ່ຽນຢ່າງແຂງແຮງ, ພ້ອມທັງ ໄດ້ເນັ້ນໜັກໃຫ້ອຳນາດການປົກຄອງບ້ານຕ້ອງໄດ້ເພີ່ມທະວີສຶກສາອົບຮົມດ້ານການເມືອງ ແນວຄິດໃຫ້ພໍ່ແມ່ປະຊາຊົນເພື່ອສ້າງຄວາມຮັບຮູ້ເຂົ້າໃຈ ດ້ານແນວທາງນະໂຍບາຍຂອງພັກ-ລະບຽບກົດໝາຍຂອງລັດດີຂື້ນກ່ວາເກົ່າ. ພ້ອມດຽວກັນ ຍັງໄດ້ເຄື່ອນໄຫວ ເບິ່ງເຂດຟື້ນຟູໄພພິບັດຢູ່ເມືອງສະໜາມໄຊ, ພ້ອມທ່ຽວຊົມເບິ່ງສະຖານທີ່ທ່ອງທ່ຽວຕາດແຊພະ ແລະ ສະຖານທີ່ວັດວາອາຮາມຕື່ມອີກ.