ສາທາຄາດຄະເນວ່າຈຳນວນຜູ້ຕິດເຊື້ອໂ ຄ ວິ ດ-19 ໃໝ່ປະຈຳວັນອາດຈະເພີ່ມສູງເປັນປະຫວັດການ

0
103

ປັດຈຸບັນ ສະພາບການລະບາດຂອງພະຍາດໂຄວິດ-19 ເຫັນວ່າການຕິດເຊື້ອໃນຊຸມຊົນຍັງເພີ່ມຂຶ້ນຢ່າງຕໍ່ເນື່ອງໃນແຕ່ລະວັນ ໂດຍສະເພາະຢູ່ນະຄອນຫລວງວຽງຈັນ ແມ່ນໜ້າເປັນຫ່ວງ ເນື່ອງຈາກພົບຜູ້ຕິດເຊື້ອໂຄວິດ-19 ຫລັກພັນໃນແຕ່ລະວັນ ທຸກຄົນແມ່ນມີຄວາມສ່ຽງສູງ ແລະ ສາມາດຕິດເຊື້ອໄດ້ທຸກທີ່ ແລະ ທຸກເວລາ, ຖ້າຫາກຍັງບໍ່ປະຕິບັດຕາມແຈ້ງການຂອງຄະນະສະເພາະກິດ ແລະ ຄຳແນະນຳຂອງຂະແໜງການກ່ຽວຂ້ອງວາງອອກໃນແຕ່ລະໄລຍະ ຢ່າງເຄັ່ງຄັດ.

ທ່ານ ນາງ ບົວຜັນ ຄໍາພາພົງ ຜ່ານຮອງສູນວິເຄາະ ແລະ ລະບາດວິທະຍາ ກະຊວງສາທາລະນະສຸກ ລາຍງານໃຫ້ຮູ້ວ່າ: ມາຮອດໃນວັນທີ 31 ມີນາ 2022 ສປປ ລາວ ກວດພົບເຊື້ອໂຄວິດ-19 ເພີ່ມ 2.762 ຄົນ ໃນນັ້ນ ຕິດເຊື້ອພາຍໃນ2.743 ຄົນ ແລະ ນໍາເຂົ້າ19 ຄົນ, ລວມຜູ້ຕິດເຊື້ອທັງໝົດ 176.898 ຄົນ, ອອກໂຮງໝໍວານນີ້ 435 ຄົນ, ກຳລັງປິ່ນປົວ 5.784 ຄົນ ແລະ ເສຍຊີວິດທັງໝົດ 665 ຄົນ (ເສຍຊີວິດໃໝ່ 1 ຄົນຈາກແຂວງຫລວງນ້ຳທາ)

ສຳລັບ ຜູ້ຕິດເຊື້ອໂຄວິດ-19 ພາຍໃນໃໝ່ ທັງໝົດ 2.743 ຄົນ ແມ່ນຈາກນະຄອນຫລວງວໜງຈັນ 1.345 ຄົນ, ສະຫວັນນະເຂດ 364 ຄົນ, ໄຊຍະບູລີ 154 ຄົນ, ຄໍາມ່ວນ 128 ຄົນ, ແຂວງວຽງຈັນ 115 ຄົນ, ຜົ້ງສາລີ 86 ຄົນ, ອຸດົມໄຊ 71 ຄົນ, ອັດຕະປື 69 ຄົນ, ຫລວງພະບາງ 65 ຄົນ, ຊຽງຂວາງ 60 ຄົນ, ສາລະວັນ 51 ຄົນ, ເຊກອງ 42 ຄົນ, ໄຊສົມບູນ 41 ຄົນ, ຫົວພັນ 40 ຄົນ, ບໍ່ແກ້ວ 40 ຄົນ, ບໍລິຄຳໄຊ 38 ຄົນ, ຫລວງນ້ຳທາ 24 ຄົນ ແລະ ແຂວງຈຳປາສັກ 10 ຄົນ. ສໍາລັບການຕິດເຊື້ອນໍາເຂົ້າ ມີ 19 ຄົນ ຈາກນະຄອນຫລວງວຽງຈັນ 10 ຄົນ, ສະຫວັນນະເຂດ 6 ຄົນ, ບໍລິຄຳໄຊ 2 ຄົນ ແລະ ຈໍາປາສັກ 1 ຄົນ ເຊິ່ງທັງໝົດໄດ້ເຂົ້າຈໍາກັດບໍລິເວນຕາມສະຖານທີ່ກຳນົດໄວ້ກ່ອນຈະກວດພົບເຊື້ອ.

ກ່ອນຈະເຂົ້າສູ່ໄລຍະບຸນປີໃໝ່ລາວໃນອີກ 2 ອາທິດຂ້າງໜ້ານີ້ ຄາດຄະເນວ່າຈຳນວນຜູ້ຕິດເຊື້ອໂຄວິດ-19 ໃໝ່ປະ ຈຳວັນ ອາດຈະເພີ່ມສູງຂຶ້ນເປັນຈຳນວນຫລາຍ, ຖ້າຫາກປ່ອຍປະລະເລີຍໃນການປະຕິ ບັດມາດຕະການປ້ອງກັນຕົນເອງ. ບາງທ່ານວາງແຜນທີ່ຈະໄປອວຍພອນປີໃໝ່ຜູ້ໃຫຍ່, ຜູ້ເຖົ້າຜູ້ແກ່ ລວມທັງການສັງສັນກິນເຂົ້າກັບຄອບຄົວ ແລະ ໝູ່ເພື່ອນ, ການອະນາໄມເຮືອນຊານໃຫ້ສະອາດປອດເຊື້ອ ແລະ ຊຸມຊົນສະອາດປາສະຈາກພະຍາດໂຄວິດ-19 ຈຶ່ງມີຄວາມຈຳເປັນເພື່ອກຽມຄວາມພ້ອມກ່ອນເຂົ້າສູ່ປີໃໝ່ລາວ ເຊິ່ງຖືວ່າເປັນສ່ວນສຳ ຄັນໃນການປ້ອງກັນການແຜ່ລະບາດຂອງພະຍາດໂຄວິດ ໄດ້ອີກຊ່ອງທາງໜຶ່ງ.