ເພີ່ມຈຸດຂາຍປີ້ລົດໄຟລາວ-ຈີນອີກເປັນບ່ອນທີ 2 ! ຄິດຄ່າບໍລິການນອກສະຖານທີ່ໃນລາຄາ 20.000 ກີບ/ປີ້

    0
    72

    ຈຸດຂາຍປີ້ລົດໄຟຢູ່ແຂວງຫຼວງພະບາງຈະເລີ່ມເປີດໃຫ້ບໍລິການໃນວັນທີ 17 ມີນາ 2021,ຈຸດຂາຍປີ້ດັ່ງກ່າວແມ່ນຢູ່ຖະໜົນໂພທິສາລາດໃຈກາງຕົວເມືອງຫຼວງພະບາງ, ກົງກັນຂ້າມກັບອາຄານສຳນັກງານຫ້ອງວ່າການແຂວງ ແລະ ພະແນກຕ່າງປະເທດ, ຫ່າງຈາກຕະຫຼາດກາງຄືນປະມານ 650 ແມັດ ແລະຫ່າງຈາກເດີ່ນຈະຕຸລັດ ປະມານ200 ແມັດ.

    ບໍລິສັດລົດໄຟລາວ-ຈີນໃຫ້ຮູ້ວ່າ: ການເປີດຈຸດຂາຍປີ້ລົດໄຟແຫ່ງທີ່ສອງຢູ່ຫຼວງພະບາງແມ່ນເພື່ອອໍານວຍຄວາມສະດວກໃຫ້ແກ່ການຊື້ປີ້ຂອງປະຊາຊົນໃນເມືອງລຽບຕາມເສັ້ນທາງລົດໄຟ, ບວກກັບກະແສຕອບຮັບທີ່ດີຂອງຈຸດຂາຍປີ້ທໍາອິດທີ່ເປີດໃນນະຄອນຫຼວງວຽງຈັນໃນໄລຍະຜ່ານມາ.

    ຂໍ້ມູນແຈ້ງວ່າ: ຈຸດຂາຍປີ້ລົດໄຟດັ່ງກ່າວແມ່ນກຳນົດຂາຍປີ້ ທີ່ຈະເດີນທາງຈາກສະຖານີຫຼວງພະບາງ-ສະຖານີເມືອງໄຊ, ສະຖານີບໍ່ເຕ່ນ (ຖ້ຽວລົດໄຟ C82) ແລະ ຫຼວງພະບາງ-ນະຄອນຫຼວງວຽງຈັນ, ວັງວຽງ (ຖ້ຽວລົດໄຟ C81/C83), ປີ້ທີ່ຂາຍແມ່ນຄິດຄ່າບໍລິການນອກສະຖານທີ່ໃນລາຄາ 20.000 ກີບ/ປີ້.

    ເວລາຂາຍ 10:00 ໂມງເຊົ້າ ຫາ 12:00 ໂມງ, 12:30 ໂມງ ຫາ 15:30 ໂມງທຸກໆມື້ ແລະຈະຢຸດຂາຍເມື່ອປີ້ຫມົດ, ຄົນໜຶ່ງຈໍາກັດຊື້ໄດພຽງແຕ່ 2 ປີ້, ໃນເວລາຊື້ປີ້ຈໍາເປັນຕ້ອງກວດສອບບັດປະຈຳໂຕ ແລະໃບຢັ້ງຢືນການສັກວັກຊີນ (ບັດຂຽວ) ຂອງຜູ້ທີ່ຈະຊື້ປີ້, ຈຸດຂາຍປີ້ບໍ່ຮອງຮັບການຊຳລະດ້ວຍເງິນສົດ ແຕ່ຮອງຮັບການຊຳລະເງິນດ້ວຍການຮູດບັດ (UnionPay) ແລະ QR Code ( Onepay, UnionPay, Alipay ແລະ Wechat ) ທີ່ເຄື່ອງ POS.

    ຂໍ້ມູນ: ທາງລົດໄຟລາວ-ຈີນ.

    LEAVE A REPLY

    Please enter your comment!
    Please enter your name here