ພາຍໃນອາທິດນີ້ລາຄານໍ້າມັນເຊື້ອໄຟ ອາດຈະມີການປັບ ຂຶ້ນອີກ

0
157

ລັດຖະບານລາວ ຕາງໜ້າໂດຍກະຊວງອຸດສາຫະກໍາ ແລະ ການຄ້າອາດຈະມີການປັບຂຶ້ນລາຄານໍ້າມັນເຊື້ອ ໄຟທຸກປະເພດອີກຮອບໃໝ່ພາຍໃນອາທິດນີ້ ຫຼື ເປັນຄັ້ງທີ 7 ໃນປີ 2022 ພາຍຫຼັງທີ່ລັດຖະມົນຕີກະຊວງ ອຸດສາຫະກໍາ ແລະ ການຄ້າໄດ້ໃຫ້ສໍາພາດຕໍ່ສື່ມວນຊົນເມື່ອມໍ່ໆມານີ້ວ່າຈະໄດ້ຈັດ ຕັ້ງການປັບລາຄາ ນໍ້າມັນເຊື້ອໄຟ ຈາກ 15 ວັນ ມາເປັນ 5-7 ວັນ ນັ້ນໝາຍຄວາມວ່າຈາກທີ່ເຄີຍປັບລາຄານໍ້າມັນເຊື້ອ ໄຟຂຶ້ນ ຫຼື ລົງ ຈາກ 2 ເທື່ອຕໍ່ເດືອນ ກໍ ຈະມີການປັບເປັນ 3-4 ຄັ້ງຕໍ່ເດືອນໃນໄລຍະທີ່ສະພາບການເໜັງຕິງເພີ່ມ ຂຶ້ນຂອງລາຄານໍ້າມັນໃນຕະຫຼາດໂລກໃນປັດຈຸບັນ ຊຶ່ງກະຊວງອຸດສາຫະກໍາ ແລະ ການຄ້າໄດ້ປັບ ຂຶ້ນລາຄານໍ້າມັນເຊື້ອໄຟເປັນຄັ້ງທີ 6 ໃນປີ 2022 ເມື່ອວັນທີ 10 ມີນາ 2022 ທີ່ຜ່ານມາ.

ທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະ ການຄ້າໄດ້ກ່າວວ່າ: ລາຄານ້ຳມັນເຊື້ອ ໄຟທົ່ວ ໂລກສູງ ຂຶ້ນ ແນ່ນອນວ່າມັນໄດ້ສົ່ງຜົນໂດຍກົງ ເຮັດໃຫ້ລາຄາຂາຍຍ່ອຍນ້ຳມັນເຊື້ອໄຟ ຢູ່ປະເທດລາວກໍຕ້ອງເພີ່ມຂຶ້ນເຊັ່ນກັນ. ລາຄານໍ້າມັນທີ່ເພີ່ມຂຶ້ນຢູ່ປະເທດລາວນີ້ສ່ວນໜຶ່ງ ແມ່ນຍ້ອນອັດຕາແລກປ່ຽນເງິນຕາຕ່າງປະເທດ ເພາະການນໍາເຂົ້ານໍ້າມັນເຊື້ອໄຟແມ່ນຊື້ເປັນເງິນ ຕາຕ່າງປະເທດ. ສະເພາະປີ 2020 ແລະ 2021, ປະເທດລາວ ໄດ້ນໍາເຂົ້ານໍ້າມັນເຊື້ອໄຟ ມີມູນຄ່າສູງເຖິງ 5 ຕື້ກວ່າໂດລາສະຫະລັດ.

ທ່ານ ຄຳແພງ ໄດ້ກ່າວຕື່ມວ່າ: ເພື່ອແກ້ໄຂສະພາບການສະໜອງໃຫ້ພຽງພໍກັບຄວາມຕ້ອງການຊົມໃຊ້, ໃນຕໍ່ໜ້າຖ້າລາຄາຍັງສືບຕໍ່ປັບຂຶ້ນສູງເຊັ່ນໃນປັດຈຸບັນ, ກະຊວງອຸດສາຫະກໍາ ແລະ ການຄ້າ ຈະໄດ້ຈັດຕັ້ງ ການ ປັບລາຄານໍ້າມັນເຊື້ອໄຟ ຈາກ 15 ວັນ ມາເປັນ 5-7 ວັນ ເຊິ່ງແນ່ນອນວ່າ ຈະເຮັດໃຫ້ລາຄາ ນໍ້າມັນເຊື້ອໄຟ ພາຍໃນປະເທດ ຕ້ອງໄດ້ປັບຂຶ້ນສູງ ຕາມການປັບຂຶ້ນຂອງຕົ້ນທຶນການນໍາເຂົ້າ. ສະເພາະການຫຼຸດຜ່ອນຜົນກະທົບຂອງປະຊາຊົນຫາກການປັບລາຄາຂຶ້ນຂອງນໍ້າມັນເຊື້ອໄຟ, ບັນດາຂະແໜງການລັດທີ່ກ່ຽວຂ້ອງກໍຈະໄດ້ເອົາໃຈໃສ່ເລັ່ງ ຄົ້ນຄວ້າຊອກຫາວິທີທາງ ເຊັ່ນ: ການຫຼຸດກອງທຶນບູລະນະທາງຫຼວງ, ການກໍານົດວິທີການຈັດເກັບລາຍຮັບຂອງລັດ ດ້ານພັນທະພາສີ, ອາກອນຕ່າງໆ ເປັນອັນສະເພາະໃນໄລຍະທີ່ລາຄານໍ້າມັນເຊື້ອໄຟປັບຂຶ້ນສູງ ເພື່ອເຮັດ ໃຫ້ລາຄານໍ້າມັນເຊື້ອໄຟ ພາຍໃນປະເທດຂອງເຮົາ ຄ່ອຍປັບຂຶ້ນຢ່າງເປັນລະບົບ ແລະ ບໍ່ຂຶ້ນສູງຫຼາຍຈົນເກີນໄປ.

ປັດຈຸບັນນີ້ ຢູ່ນະຄອນຫຼວງວຽງຈັນ ລາຄານໍ້າມັນແອັດຊັງພິເສດສູງເຖິງ 18.640 ກີບ/ລິດ, ແອັດຊັງທໍາມະດາ 16.380 ກີບ/ລິດ ແລະ ກາຊວນ 14.510 ກີບ/ລິດ.