ພະນັກງານ ແລະ ປະຊາຊົນ ນະຄອນ ຫລວງພະບາງ ຮ່ວມບໍລິຈາກເລືອດຊ່ວຍເຫລືອສັງຄົມ

0
204

ຂປລ. ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ວັນທີ 11 ມີນາ ນີ້, ສະຫະພັນແມ່ຍິງນະຄອນຫລວງພະບາງ ຮ່ວມກັບ ສູນເລືອດອົງການກາແດງລາວປະຈຳແຂວງຫລວງພະບາງ ຈັດພິທີຮັບການບໍລິຈາກເລືອດແບບສະໝັກໃຈ ໂດຍມີ ທ່ານ ວິໄລທອງ ມະນີວອນ ຮອງເຈົ້ານະຄອນ ຫລວງພະບາງ, ທ່ານ ວຽງສະຫວັນ ກະເສີມສຸກ ຫົວໜ້າອົງການກາແດງແຂວງຫລວງພະບາງ, ພ້ອມດ້ວຍຫົວໜ້າ-ຮອງຫົວໜ້າຫ້ອງການ, ພະນັກງານ ແລະ ປະຊາຊົນ ເຂົ້າຮ່ວມບໍລິຈາກ ໂດຍໄດ້ເລືອດທັງໝົດ 64 ຖົງ.

ໃນພິທີ, ທ່ານ ວຽງສະຫວັນ ກະເສີມສຸກ ໄດ້ລາຍງານສະພາບການຈັດກິດຈະກໍາ ບໍລິຈາກເລືອດ ໃນໄລຍະຜ່ານມາ ແລະ ຄວາມຈຳເປັນຂອງການນຳໃຊ້ເລືອດ ເຊິ່ງຕາມແຜນແມ່ນ 4.900 ຖົງຕໍ່ປີ ເພື່ອສະໜອງໃຫ້ແກ່ ການບໍລິການປີ່ນປົວຄົນເຈັບ ໃນ 5 ໂຮງໝໍໃຫຍ່ຢູ່ພາຍໃນແຂວງຄື: ໂຮງໝໍແຂວງ, ໂຮງໝໍ 107, ໂຮງໝໍສາກົນລາວ-ຈີນ, ໂຮງໝໍເມືອງນ້ຳບາກ ແລະ ໂຮງໝໍເດັກແຂວງຫລວງພະບາງ, ນັບແຕ່ຕົ້ນປີ 2022 ມາຮອດປັດຈຸບັນ ແມ່ນຍັງບໍ່ທັນບັນລຸຕາມແຜນ.

ໂອກາດນີ້, ທ່ານ ວິໄລທອງ ມະນີວອນ ກໍໄດ້ມີຄຳເຫັນວ່າ: ການຈັດກິດຈະກຳບໍລິຈາກເລືອດຄັ້ງນີ້ ເປັນການສ້າງຂະບວນການຂໍ່ານັບຮັບຕ້ອນ ວັນແມ່ຍິງສາກົນ ທີ 8 ມີນາ ຄົບຮອບ 112 ປີ ແລະ ວັນສ້າງຕັ້ງພັກປະຊາຊົນປະຕິວັດລາວ ວັນທີ 22 ມີນາ ຄົບຮອບ 67 ປີ. ພ້ອມທັງໄດ້ຮຽກຮ້ອງໃຫ້ທຸກຄົນທີ່ມີເງື່ອນໄຂບໍລິຈາກເລືອດ ໃຫ້ພ້ອມກັນບໍລິຈາກເລືອດເພື່ອຊ່ວຍເຫລືອຜູ້ເຈັບປ່ວຍ ໃຫ້ຫາຍດີ ແລະ ມີຊີວິດຢູ່ກັບສັງຄົມ.

ຂ່າວ: ອາພຸດເດດ ບຸບຜາ