ສ.ເກົາຫລີ ກຽມເປີດຮັບນັກເດີນທາງ ສັກວັກຊີນປ້ອງກັນໂ ຄ ວິ ດ-19 ຄົບໂດສ ເຂົ້າປະເທດບໍ່ຕ້ອງກັກຕົວ

0
105

ສ.ເກົາຫລີ ກຽມເປີດຮັບນັກເດີນທາງຕ່າງປະເທດທີ່ສັກວັກຊີນຄົບໂດສແລ້ວ ເດີນທາງເຂົ້າປະເທດໂດຍບໍ່ຕ້ອງກັກຕົວ ເລີ່ມທ້າຍເດືອນມີນາເປັນຕົ້ນໄປ.ວັນທີ 12 ມີນາ 2022, ກະຊວງສາທາລະນະສຸກ ສ.ເກົາຫລີ ປະກາດວ່າ: ຊາວຕ່າງປະເທດທີ່ໄດ້ຮັບວັກຊີນປ້ອງກັນພະຍາດໂຄວິດ-19 ຄົບໂດສແລ້ວ ຈະໄດ້ຮັບການຍົກເວັ້ນຈາກການກັກຕົວ 7 ວັນເມື່ອເດີນທາງເຂົ້າປະເທດ ສ.ເກົາຫລີ ໂດຍມີຜົນບັງຄັບໃຊ້ນັບແຕ່ວັນທີ 21 ມີນາເປັນຕົ້ນໄປ.

ສຳລັບນັກເດີນທາງທີ່ເຂົ້າຂ່າຍໄດ້ຮັບການຍົກເວັ້ນການກັກຕົວ ຕ້ອງໄດ້ຮັບວັກຊີນປ້ອງກັນພະຍາດໂຄວິດ-19 ມາແລ້ວຢ່າງໜ້ອຍສອງອາທິດ, ແຕ່ຕ້ອງບໍ່ເກີນ 180 ວັນ ລວມທັງຜູ້ທີ່ໄດ້ຮັບວັກຊີນໂດສກະຕຸ້ນ.

ເຖິງຢ່າງໃດກໍຕາມ, ປະກາດຍົກເວັ້ນການກັກຕົວດັ່ງກ່າວ ບໍ່ມີຜົນກັບນັກເດີນທາງທີ່ມາຈາກ 4 ປະເທດ ໄດ້ແກ່ ປາກິດສະຖານ, ອຸສເບກິດສະຖານ, ຢູເຄຣນ ແລະ ມຽນມາ.

ທັງນີ້, ຊາວຕ່າງປະເທດທີ່ເດີນທາງເຂົ້າ ສ.ເກົາຫລີ ທຸກຄົນຍັງຕ້ອງເຂົ້າຮັບການກວດ ATK ສອງຄັ້ງໃນວັນທີ 6 ແລະ ວັນທີ 7 ຫລັງເດີນທາງເຂົ້າປະເທດ.