ຫຼວງນ້ຳທາແຈ້ງ! ແຕ່ນີ້ຫາ 20 ມີນາ ຈົ່ງພາລູກຫຼານ 6 ປີຂຶ້ນເມືອໄປສັກວັກຊິນເຂັມທີ 1

    0
    147

    ເຖິງວ່າປັດຈຸບັນນີ້ສະພາບສັງຄົມລາວແມ່ນກຳລັງຈະກັບຄືນສູ່ສະພາວະປົກກະຕິກໍ່ຕາມ ແຕ່ສຳລັບການປ້ອງກັນສຸຂະພາບ ແລະຊີວິດຂອງລູກຫຼານອັນເປັນທີ່ຮັກໂດຍຜ່ານມາສັກວັກຊິນແມ່ນເປັນຊ່ອງທາງທີ່ດີທີ່ສຸດແລ້ວ ສຳລັບການຕ້ານເຊື້ອພະຍາດໂຄວິດ19 ບໍ່ຖືເບົາ ຫຼື ເມີນເສີຍ ເພາະເຮົາບໍ່ອາດປະເມີນຄວາມຮຸນແຮງຂອງເຊື້ອພະຍາດໃນຕົວບຸກຄົນໄດ້.

    ວັນທີ 9 ມີນາ 2022 ຢູ່ທີ່ໂຮງຮຽນປະຖົມສົມບຸນອຸດົມສິນ ເມືອງຫຼວງນໍ້າທາ ແຂວງຫຼວງນໍ້າທາ ໄດ້ເປີດຂະບວນການ ສັກຢາວັກຊິນປ້ອງກັນພະຍາດໂຄວິດ- 19 ໃຫ້ເດັກກຸ່ມເປົ້າໝາຍ ອາຍຸ 6 ປີຂື້ນໄປ ໂດຍການເຂົ້າຮ່ວມຂອງ ດຣ ຄໍາຈັນ ອິນທອງໄຊ ປະທານແນວລາວສ້າງຊາດແຂວງ, ມີຄະນະຮັບຜິດຊອບພິທີການຂັ້ນແຂວງ, ເມືອງ, ວິຊາການແພດ, ຄູອາຈານ,ພໍ່ແມ່ຜູ້ປົກຄອງເດັກ ແລະ ນ້ອງນ້ອຍນັກຮຽນເຂົ້າ ຮ່ວມ.

    ທ່ານ ດຣ ຄໍາຈັນ ອິນທອງໄຊ ປະທານແນວລາວສ້າງຊາດແຂວງໄດ້ໃຫ້ຮູ້ວ່າ : ການສັກຢາວັກຊິນປ້ອງກັນພະຍາດໂຄວິດ-19 ເຂັມທີ 1 ໃຫ້ເດັກກຸ່ມເປົ້າໝາຍ ອາຍຸ 6 ຂື້ນໄປ ໃນທົ່ວແຂວງຫຼວງນໍ້າທາ ໃນທ່າມກາງສະພາບຂອງທົ່ວໂລກ ກໍາລັງປະເຊີນໜ້າກັບການລະບາດຂອງພະຍາດ COVID-19 ຢ່າງຮຸນແຮງ ແລະ ໄດ້ສ້າງຄວາມເສຍຫາຍຢ່າງຫຼວງຫຼາຍໃນຫຼາຍປະເທດ ໃນນັ້ນປະເທດລາວຂອງພວກເຮົາ ກໍ່ເປັນປະເທດໜຶ່ງທີ່ໄດ້ຮັບການກະທົບເຊັ່ນດຽວກັນ, ແຕ່ພວກເຮົາກໍ່ໄດ້ພ້ອມກັນເຝົ້າລະວັງ, ສະກັດກັ້ນ ແລະ ແກ້ໄຂຢ່າງຈິງຈັງ ມີການຮ່ວມໄມ້,ຮ່ວມມືຈາກອົງການປົກຄອງຂັ້ນແຂວງ, ຂັ້ນເມືອງ ແລະ ທ້ອງຖິ່ນຂັ້ນບ້ານ.

    ສຳລັບແຂວງຫຼວງນ້ຳທາໄດ້ມີທ່າອ່ຽງຫລຸດລົງກໍ່ຕາມແຕ່ກໍ່ຍັງເປັນໄພອັນຕະລາຍ ແລະ ຂົ່ມຂູ່ເຖີງຊີວິດອີນຊີຂອງພວກເຮົາຢູ່ຕະຫລອດເວລາ. ສະນັ້ນຈື່ງຍັງມີຄວາມຈຳເປັນທີ່ສຸດໃນການຍົກລະດັບອັດຕາການສັກຢາວັກຊີນປ້ອງກັນພະຍາດ COVID-19 ໃຫ້ແກ່ພະນັກງານລັດຖະກອນ, ປະຊາຊົນ ແລະ ບັນດາເດັກນ້ອຍລູກຫຼານຂອງພວກເຮົາຢູ່ພາຍໃນແຂວງໃຫ້ສູງຂື້ນ ແລະ ທົ່ວເຖິງກວ່າເກົ່າ.

    ການສັກຢາວັກຊິນປ້ອງກັນພະຍາດໂຄວິດ-19 ໃຫ້ເດັກກຸ່ມເປົ້າໝາຍ ທົ່ວແຂວງ ທັງໝົດມີ 26.565 ຄົນ, ມີ ຈຸດສັກຢາ 490 ຈຸດ, ທີມງານແພດ 60 ທີມ, ຈໍານວນ 300 ຄົນ, ວັກຊີນທີ່ນໍາມາສັກໃນຄັ້ງນີ້ ແມ່ນ ຊີໂນແວັກ ຄາດວ່າຈະໃຫ້ບັນລຸສັກຢາໃຫ້ເດັກກຸ່ມເປົ້າໝາຍໃຫ້ໄດ້ 95% ຂື້ນໄປ ແລະ ຈະໄດ້ດໍາເນີນໄປຮອດ ວັນທີ 20 ມີນາ 2022 ຈຶ່ງສໍາເລັດ.

    ຂໍ້ມູນຈາກ: Lao National Radio

    LEAVE A REPLY

    Please enter your comment!
    Please enter your name here