ມາເລເຊຍ ກຽມເລີ່ມປັບໂ ຄ ວິ ດ-19 ເປັນ “ພະຍາດປະຈຳຖິ່ນ” ເປີດຊາຍແດນ 1 ເມສານີ້

0
181

ວັນທີ 8 ມີນາ 2022, ສຳນັກຂ່າວຊິນຮົວລາຍງານວ່າ: ທ່ານ ອິສມາອິລ ຊາບຣີ ຢາຄ໊ອບ ນາຍົກລັດຖະມົນຕີມາເລເຊຍ ເປີດເຜີຍວ່າ: ມາເລເຊຍຈະເລີ່ມຂະບວນການປັບປ່ຽນການລະບາດໃຫຍ່ຂອງພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ເປັນພະຍາດປະຈຳຖິ່ນ ແລະ ກັບມາເປີດຊາຍແດນຮັບນັກເດີນທາງຕ່າງປະເທດນັບແຕ່ວັນທີ 1 ເມສາ ເປັນຕົ້ນໄປ.

ມະຕິດັ່ງກ່າວເປັນຜົນຈາກໂຄງການປຸກລະດົມສັກວັກຊີນປ້ອງກັນພະຍາດໂຄວິດ-19 ລະດັບປະເທດທີ່ປະສົບຜົນສຳເລັດ ແລະ ເປັນກົນລະຍຸດທີ່ຈະຊ່ວຍເປີດທາງໃຫ້ຊາວມາເລເຊຍກັບມາໃຊ້ຊີວິດໄດ້ເກືອບເປັນປົກກະຕິ ຫລັງຈາກຕ້ອງຕໍ່ສູ້ກັບພະຍາດໂຄວິດ-19 ມາ 2 ປີ.

ທ່ານ ອິສມາອິລ ຊາບຣີ ຍັງປະກາດຫລຸດຜ່ອນຂໍ້ຈຳກັດຫລາຍຢ່າງເຊັ່ນ: ອະນຸຍາດຮ້ານອາຫານເປີດຫລັງ 24:00 ໂມງ ແລະ ຍົກເລີກການຈຳກັດຈຳນວນຜູ້ເຂົ້າຮ່ວມງານ ຫລື ກິດຈະກຳຂະໜາດໃຫຍ່ 50% ຂອງຄວາມຈຸ ແຕ່ຈະຍັງບັງຄັບໃຊ້ຄຳສັ່ງໃສ່ຜ້າປິດປາກ-ດັງໃນສະຖານທີ່ສາທາລະນະ ແລະ ການໃຊ້ແອບພລິເຄຊັນຈັດການພະຍາດໂຄວິດ-19 ຂອງລັດຖະບານຖ້າເດີນທາງຢ້ຽມຢາມສະຖານທີ່ຕ່າງໆ.

ສຳລັບການເປີດຊາຍແດນຮັບນັກທ່ອງທ່ຽວຕ່າງປະເທດອີກ, ທ່ານ ອິສມາອິລ ຊາບຣີ ເຜີຍຄວາມໝັ້ນໃຈວ່າ: ການດຳເນີນດັ່ງກ່າວຈະກະຕຸ້ນເສດຖະກິດມາເລເຊຍ ແລະ ເຮັດໃຫ້ຂະແໜງອຸດສາຫະກຳການທ່ອງທ່ຽວທີ່ໄດ້ຮັບຜົນກະທົບກັບມາດຳເນີນໄດ້ຢ່າງເຕັມສ່ວນ ໂດຍນັກເດີນທາງທີ່ສັກວັກຊີນຄົບໂດສບໍ່ຈຳເປັນຕ້ອງກັກຕົວເມື່ອມາທ່ຽວມາເລເຊຍ ແຕ່ຕ້ອງກວດພະຍາດກ່ອນອອກເດີນທາງ ແລະ ຫລັງມາເຖິງ.

ໂຄງການສຳລັບນັກເດີນທາງທາງອາກາດທີ່ສັກວັກຊີນປ້ອງກັນພະຍາດໂຄວິດ-19 ແລ້ວ (VTL) ລະຫວ່າງມາເລເຊຍກັບກຳປູເຈຍ ແລະ ໄທ ຈະເລີ່ມຕົ້ນວັນທີ 15 ມີນານີ້, ສ່ວນໂຄງການແບບດຽວກັນທີ່ເຮັດນຳສິງກະໂປຈະຂະຫຍາຍຄວບຄຸມຈຸດເຂົ້າປະເທດອື່ນໆໃນມາເລເຊຍ.

ທັງນີ້, ກະຊວງສາທາລະນະສຸກມາເລເຊຍລາຍງານການກວດພົບຜູ້ຕິດເຊື້ອໂຄວິດ-19 ເພີ່ມ 26.856 ຄົນ ນັບຮອດເວລາ 24:00 ໂມງຂອງວັນທີ 7 ມີນາ ເຮັດໃຫ້ມີຜູ້ຕິດເຊື້ອສະສົມ 3.649.463 ຄົນ ແລະ ມີຜູ້ເສຍຊີວິດເພີ່ມ 77 ຄົນ ເຮັດໃຫ້ຈຳນວນຜູ້ເສຍຊີວິດສະສົມມີ 33.305 ຄົນ.