ຫົວໃຈຈະວາຍ ຫຼານນ້ອຍ 11 ເດືອນຄານມາເອົາສາກຊັກດຸກລົງພື້ນ

    0
    57

    ໃຜທີ່ມີລູກນ້ອຍ ຕ້ອງເບິ່ງເລື່ອງນີ້ເປັນອຸທາຫອນ ເປັນຕາຢ້ານໃຈຫາຍນຳ ຫຼານນ້ອຍໄວ 11 ເດືອນເກືອບເອົາຊີວິດບໍ່ລອດຍ້ອນຄວາມມັກງ່າຍຂອງຜູ້ໃຫຍ່! ຢ່າໄດ້ເຜີໂດຍເດັດຂາດ ເພາະບາງທີສ້ຽວວິນາທີກໍ່ມີຄວາມໝາຍຍິ່ງໃຫຍ່ໃນການຊ່ວຍຊີວິດຄົນໆໜຶ່ງທີ່ໄດ້ເກີດມາບົນໂລກນີ້.


    ເລື່ອງລາວຕໍ່ໄປນີ້ເປັນເຫດການທີ່ເກີດຂຶ້ນຢູ່ຈັງຫວັດລະຢອງ ປະເທດໄທ ແຕ່ຢາກໃຫ້ພໍ່ແມ່ຜູ້ປົກຄອງນຳມາເຕືອນໃຈໂຕເອງ ຫຼັງຈາກທີ່ຫຼານນ້ອຍໄວ 11 ເດືອນ ໄດ້ຄານໄປເອົາສາຍສາກໂທລະສັບມາອົມ ແລະຖືກໄຟຊັອດເກືອບຈະເອົາຊີວິດບໍ່ລອດ.
    ຕາມການລາຍງານຂອງສື່ມວນຊົນໃຫ້ຮູ້ວ່າ ເດັກຄົນດັ່ງກ່າວມີຮ່ອງຮອຍຖືກໄຟໄໝ້ຢູ່ແກ້ມດ້ານຂວາ ແລະລີ້ນ ຈາກການບອກເລົ່າຂອງແມ່ເຖົ້າຂອງຫຼານນ້ອຍຜູ້ໂຊກຮ້າຍນັ້ນ ບອກວ່າໃນວັນເກີດເຫດເປັນວັນພັກ ຈິ່ງມີບັນດາໝູ່ເພື່ອນຂອງແມ່ຫຼານນ້ອຍມາຫຼິ້ນນຳກັນຫຼາຍຄົນ ແລະໄດ້ເອົາໂທລະສັບມາສຽບສາກແບັດໄວ້ຢູ່ພື້ນເຮືອນ ຫຼັງສາກເຕັມແລ້ວໄດ້ຖອດໂທລະສັບອອກແຕ່ສາຍສາກຍັງສຽບຄາປັກຢູ່.
    ຫຼັງຈາກນັ້ນກໍ່ນັ່ງຫຼິ້ນປົກກະຕິ ແຕ່ຢູ່ໆຫຼານຊາຍກໍ່ຄານມາບໍລິເວນສາຍສາກແບັດ ແລະມີອາການຊັກກະດຸກກັບພື້ນ ເຫັນວ່າສາຍສາກມືຖືຄາຢູ່ປາກ ແມ່ເຖົ້າຮີບເຂົ້າໄປອຸ້ມເອົາແຕ່ມີກະແສໄຟດູດຢູ່ ຈິ່ງຮ້ອງໃສ່ກັນໃຫ້ຮີບຕັດສະວິດໄຟເນື່ອງຈາກໃນເຮືອນບໍ່ມີເຄື່ອງຕັດໄຟອັດຕະໂນມັດ.
    ຫຼັງຈາກນັ້ນກໍ່ຮີບອຸ້ມຫຼານໄປສົ່ງໂຮງໝໍ ເພື່ອທຳການຮັກສາຕາມຂັ້ນຕອນ ແລະຕອນນີ້ຫຼານນ້ອຍແມ່ນປອດໄພແລ້ວ ແຕ່ແມ່ເຖົ້າໄດ້ຝາກເລື່ອງນີ້ໃຫ້ເປັນອຸທາຫອນໃຫ້ຜູ້ປົກຄອງຈົ່ງຢ່າປະໝາດກັບສິ່ງເລັກນ້ອຍໆທີ່ຄາດບໍ່ເຖິງ ອັນສຳຄັນເລື່ອງໄຟຄວນເກັບໄວ້ໃຫ້ໄກໃຫ້ສູງຈາກມືເດັກນ້ອຍ ເພາະຄົນອື່ນໆອາດບໍ່ໂຊກດີຄືກັບຫຼານຊາຍກໍ່ເປັນໄດ້.

    LEAVE A REPLY

    Please enter your comment!
    Please enter your name here