ອາເລັກຊານດຼາ ບຸນຊ່ວຍ ສົ່ງໃຈອວຍພອນວັນແມ່ຍິງສາກົນ ພ້ອມມີຜົນງານໃໝ່ໃຫ້ໄດ້ຕິດຕາມ

    0
    91

    ເນື່ອງໃນໂອກາດວັນແມ່ຍິງສາກົນ 8 ມີນາ 2022 ຄົບຮອບ 112 ປີນີ້ ທີມຂ່າວບັນເທີງໄດ້ມີໂອກາດສໍາພາດແມ່ຍິງລາວທີ່ມີຄວາມງາມ ແລະ ສ້າງຊື່ສຽງທີ່ດີໃຫ້ກັບປະເທດລາວມາແລ້ວນັບບໍ່ຖ້ວນ ກໍຄືສາວງາມຄົົນນີ້ເລີຍ ອາເລັກຊານດຼາ ບຸນຊ່ວຍ ດາລາ, ນັກຮ້ອງ ແລະ ນັກສະແດງທີ່ມີຊື່ສຽງຂອງປະເທດລາວເຮົາ.

    ເນື່ອງໃນໂອກາດວັນແມ່ຍິງສາກົນ ທີ່ຈະມາເຖິງນີ້ ຊານດຼາ ໄດ້ໃຫ້ສໍາພາດ ແລະ ຂໍອວຍພອນໃຫ້ຜູ້ເປັນແມ່, ຜູ້ເປັນເອື້ອຍ,  ຜູ້ເປັນນ້ອງສາວ ແລະ ແມ່ຍິງລາວໃນທົ່ວປະເທດໃຫ້ມີສຸຂະພາບແຂງແຮງ, ປາສະຈາກໂລກໄພໄຂ້ເຈັບ ແລະ ປາສະຈາກໂລກໂຄວິດ-19 ແລະ ທີ່ສໍາຄັນໃຫ້ທຸກຄົນເຮັດໜ້າທີ່ແມ່ຍິງທີ່ດີ ເພື່ອອະນາຄົດຂອງປະເທດຊາດຂອງພວກເຮົາ.

    ສໍາລັບຊານດຼາເອງ ຄິດວ່າຄຸນຄ່າຂອງແມ່ຍິງກໍຄື ເພດແມ່ ແລະ ແມ່ຍິງກໍແມ່ນບຸກຄົນໜຶ່ງທີ່ຢູ່ໃນສັງຄົມ ແລະ ເຮັດແນວໃດເຖິງຈະມີຄຸນຄ່າໄດ້ ສໍາຄັນທີ່ສຸດ ໜຶ່ງກໍແມ່ນໃຫ້ຝຶກຝົນຫຼໍ່ຫຼອມຕົນເອງໃຫ້ເປັນຄົນດີ, ມີສິນທໍາ ແລະ ໃຫ້ຮູ້ຈັກເອື້ອເຟື້ອເພື່ອແຜ່ໃຫ້ຜູ້ອື່ນ ເຊິ່ງເປັນພື້ນຖານສໍາຄັນເລີຍໃນການດໍາລົງຊີວິດຢູ່ໃນສັງຄົມ ແລະ ສອງໃນຖານະເປັນແມ່ຍິງຄົນໜຶ່ງກໍຄືຕ້ອງເປັນຄົນທີ່ຮັກຕົວເອງຢ່າງພຽງພໍ ແລະ ບໍ່ໄປບຽດບຽນຜູ້ອື່ນ ໄປສ້າງບັນຫາໃຫ້ຄົນອື່ນ ນີ້ແມ່ນລວມທຸກຢ່າງຄືບໍ່ເຮັດໃຫ້ຄົນອື່ນເປັນທຸກ ສໍາລັບຕົວຊານດຼາເອງ ຄິດວ່າຄຸນຄ່າສໍາຄັນແມ່ນສອງຂໍ້ນີ້ ຄືເວົ້າງ່າຍໆແມ່ນຕ້ອງເປັນຄົນດີ.

    ສ່ວນຄໍາວ່າ “ແມ່” ໃນຄວາມຄິດຂອງຊານດຼາເອງເມື່ອຄິດຫາຄໍາວ່າແມ່ເຖິງແມ່ນຕອນນີ້ຍັງບໍ່ມີຄອບຄົວ, ຍັງບໍ່ມີລູກ ແຕ່ຄິດໄວ້ຖ້າມື້ໜຶ່ງເຮົາມີເຮົາໄດ້ເປັນແມ່ ແມ່ແມ່ນຜູ້ບັງເກີດເກົ້າທີ່ໄດ້ອຸ້ມທ້ອງເຮົາມາ ເຮັດໃຫ້ເຮົາຮູ້ສຶກວ່າຄົນໆນີ້ແມ່ນເຮົາຕ້ອງໄດ້ປົກປ້ອງ ແລະ ລ້ຽງດູໃຫ້ດີ  ກໍຄືການໃຫ້ຄວາມຮັກແບບບໍ່ມີຂອບເຂດ, ບໍ່ມີຂອບຟ້າ ສາມາດໃຫ້ທຸກສິ່ງໄດ້ ແລກໄດ້ເຖິງແມ່ນຊີວິດ ແລະ ຮັກແບບບໍ່ມີເງື່ອນໄຂຄືຄໍາວ່າແມ່.

    ສໍາລັບຜົນງານຂອງຊານດຼາເມື່ອບໍ່ດົນມານີ້ທີ່ໄດ້ເຮັດໄປແລ້ວກໍມີຢ່າງຫຼາກຫຼາຍເລີຍ ແຕ່ທີ່ຜ່ານໄປບໍ່ດົນກໍແມ່ນ ບົດເພງທີ່ມີຊື່ວ່າ“ສຸຂະພາບດີ” ເຊິ່ງຖືໂອກາດໄບຍະທີ່ມີການລະບາດກໍຄືເປັນບົດເພງທີ່ໃຫ້ກໍາລັງໃຈຜູ້ທີ່ຕິດເຊື້ອພະຍາດທີ່ກໍາລັງລະບາດ ແລະ ຜູ້ທີ່ໄດ້ຮັບຜົນກະທົບເລື່ອງການງານ, ການເງິນຕ່າງໆ ໃຫ້ເຂັ້ມແຂງ, ຮັກສາສຸຂະພາບ ແລະ ໃຫ້ມີກໍາລັງໃຈ ເພື່ອໃຫ້ຜ່ານພົ້ນໄປດ້ວຍກັນ ແລະ ຜົນງານຫຼ້າສຸດໄດ້ຖ່າຍທໍາເອັມວີເພງໄປແລ້ວ ເພງທີ່ວ່າແມ່ນການປຸກລະດົມໃຫ້ເຮົາຮັກ ແລະ ມີການປົກປັກຮັກສາສິ່ງແວດລ້ອມ ກໍຄືຕົ້ນໄມ້,ສັດນໍ້າ, ສັດປ່າທັງຫຼາຍ ເພື່ອເປັນການຫຼຸດພາວະໂລກຮ້ອນ ຮັກສາສິ່ງແວດລ້ອມໃຫ້ເຮົາໄດ້ຢູ່ເຢັນເປັນສຸກ ເປັນບົດເພງທີ່ມີຊື່ວ່າ   “ໂລກສີຂຽວ”  ເປັນເພງທີ່ຊານດຼາໄດ້ຮັບຕາງໜ້າປະເທດລາວ ໃຫ້ເຮັດເປັນເວີຊັນພາສາລາວ ເຊິ່ງເພງນີ້ແມ່ນມີຫຼາຍປະເທດໄດ້ເຮັດອອກມາເປັນພາສາຕົນເອງ ທຸກຄົນແມ່ນເຮັດເພື່ອໃຫ້ໄດ້ໂຄສະນາ ແລະ ປົກປັກຮັກສາສິ່່ງແວວລ້ອມໄປນໍາກັນ.

    ສໍາລັບຊ່ອງທາງໃນການຕິດຕາມຜົນງານຂອງສາວງາມຄົນເກັ່ງຄົນນີ້ແມ່ນສາມາດຕິດຕາມໄດ້ເລີຍທີ່ ເພຈAlexandra Bounxouei- ອາເລັກຊານດຼາ ບຸນຊ່ວຍ.

    [ຮູບ: Alexandra Bounxouei]

    LEAVE A REPLY

    Please enter your comment!
    Please enter your name here