ລາວ ແລະ ໄທ ຂະຫຍາຍກອບການຮ່ວມມືການ ຊື້-ຂາຍພະລັງງານໄຟຟ້າ

0
102

ສປປ ລາວ ແລະ ຣາຊະອານາຈັກ ໄທ ຂະຫຍາຍກອບການຮ່ວມມືການ ຊື້-ຂາຍພະລັງງານໄຟຟ້າ ຈາກ 9.000 MW ເປັນ 10.500 MW, ຊຶ່ງພິທີລົງນາມເຊັນບົດບັນທຶກການຂະຫຍາຍກອບການຮ່ວມມື ນີ້ ຕາງໜ້າເຊັນໂດຍ ທ່ານ ປອ. ດາວວົງ ພອນແກ້ວ, ລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ທ່ານ ສຸພັດທະນະພົງ ພັນມີເຊົາ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງພະລັງງານ ຣາຊະອານາຈັກໄທ, ເມື່ອບໍ່ດົນມານິ້ ທີ່ນະຄອນຫຼວງວຽງຈັນ.

ໃນບົດບັນທຶກຄວາມເຂົ້າໃຈການຂະຫຍາຍກອບການຮ່ວມມືການຊື້-ຂາຍພະລັງງານໄຟຟ້າ ນີ້ ເປັນບົດບັນທຶກຄວາມເຂົ້າໃຈ ສະບັບ ທີ 6 ຊຶ່ງສະບັບທຳອິດເລີ່ມຈາກ MOU ສະບັບເດີມ 9.000 MW ໃນປີ 2016, ຊຶ່ງຈຸດປະສົງ ເພື່ອສົ່ງເສີມການຮ່ວມມືດ້ານພະລັງງານໄຟຟ້າລະຫວ່າງ ສປປ ລາວ ແລະ ຣາຊະອານາຈັກໄທ ແລະ ການໃຫ້ຄວາມສໍາຄັນກັບການຊື້ຂາຍພະລັງງານສະອາດ ແລະ ຫຼຸດຜ່ອນຜົນກະທົບຕໍ່ສິ່ງແວດລ້ອມ ລວມເຖິງກາລະໂອກາດທາງດ້ານການລົງທຶນໃນຂະແໜງພະລັງງານໄຟຟ້າ.

ໃນຕະຫຼອດໄລຍະຜ່ານມາ, ສປປ ລາວ ໄດ້ສົ່ງພະລັງງານໄຟຟ້າ ໃຫ້ຣາຊະອານາຈັກໄທ ຮອດປີ 2021 ມີທັງໝົດ 8 ໂຄງການ ສົ່ງໄຟໃນກໍາລັງຕິດຕັ້ງຕາມສັນຍາໄດ້ທັງໝົດ 5.415,8 MW ແລະ ກາງປີນີ້ ຄາດວ່າຈະສົ່ງອອກອີກ 1 ໂຄງການ ຈຳນວນ 514 MW.

ສະນັ້ນ ການຂະຫຍາຍກອບ MOU ສະບັບທີ 6 ນີ້ ຈະເປັນພື້ນຖານອັນສໍາຄັນ ເພື່ອຮອງຮັບໃນການສົ່ງກະແສໄຟຟ້າ ຈາກໂຄງການຂະໜາດໃຫຍ່ ຂອງ ສປປ ລາວ ສົ່ງອອກໄປຣາຊະອານາຈັກໄທ ໃນອະນາຄົດ, ໃນນີ້ມີບັນດາເຂື່ອນໄຟຟ້ານ້ຳຕົກນ້ຳງື່ມ-3, ປາກລາຍ, ຫຼວງພະບາງ, ປາກແບງ, ຊະນະຄາມ ແລະ ເຊກອງ 4A,4B ປະກອບສ່ວນທີ່ສໍາຄັນໃນການສ້າງລາຍຮັບທີ່ເປັນພື້ນຖານໃຫ້ແກ່ການພັດທະນາປະເທດຊາດ, ສ້າງພື້ນຖານໃຫ້ແກ່ການແກ້ໄຂຄວາມທຸກຍາກໃນໝູ່ປະຊາຊົນ ລວມເຖິງການເພີ່ມທະວີມິດຕະພາບ, ການພົວພັນອັນດີງາມ ແລະ ການຮ່ວມມືລະຫວ່າງສອງຊາດ ລາວ-ໄທ ໃຫ້ຂະຫຍາຍຕົວດ້ວຍບາດກ້າວທີ່ດີຍິ່ງໆຂື້ນ.

ສປປ ລາວ ໄດ້ວາງແນວທາງຫັນເປັນອຸດສາຫະກໍາ ແລະ ທັນສະໄໝ ເພື່ອພັດທະນາປະເທດຊາດກ້າວຂຶ້ນ, ໃນນີ້ ໄດ້ກໍານົດເອົາການພັດທະນາພະລັງງານໄຟຟ້າ ເຊິ່ງແມ່ນທ່າແຮງທີ່ສໍາຄັນຂອງລາວ ເປັນພື້ນຖານພັດທະນາເສດຖະກິດແຫ່ງຊາດ ແນໃສ່ການຈັດສັນ ແລະ ນໍາໃຊ້ແຫຼ່ງຊັບພະຍາກອນຂອງຊາດໃຫ້ມີປະສິດທິຜົນສູງ, ຕາມທິດພັດທະນາທີ່ເປັນມິດຕໍ່ສິ່ງແວດລ້ອມ ແລະ ຄວາມຍືນຍົງ.