ຄະນະກໍາມະການສາມຝ່າຍ ຮ່ວມຫາລືການປັບຄ່າແຮງຂັ້ນຕ່ຳ ກຽມສະເໜີໃຫ້ລັດຖະບານພິຈາລະນາ

    0
    161

    ໃນວັນທີ 4 ມີນາ 2022, ທີ່ເຮືອນຮັບແຂກກະຊວງແຮງງານ ແລະ ສະຫວັດດີການສັງຄົມ, ໄດ້ພ້ອມກັນຈັດກອງປະຊຸມ 3 ຝ່າຍຮ່ວມກັນ ເພື່ອປຶກສາວຽກງານການປັບຂຶ້ນຄ່າແຮງຂັ້ນຕ່ຳ ຕາມຜົນການຈັດຕັ້ງປະຕິບັດກອງປະຊຸມສາມຝ່າຍ ກ່ຽວກັບ ວຽກງານສາຍພົວພັນແຮງງານ ຄັ້ງທີ 19, ໂດຍການເຂົ້າຮ່ວມເປັນປະທານຂອງທ່ານນາງ ໃບຄໍາ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດ ດີການສັງຄົມ, ທ່ານ ນາງ ອາລີ ວົງໜໍ່ບຸນທຳ ປະທານຄະນະບໍລິຫານສູນກາງສະຫະພັນກໍາມະບານລາວ ແລະ ທ່ານ ວັນທອງ ສິດທິກຸນ ຮອງປະທານສະພາການຄ້າ ແລະ ອຸດສະຫະກໍາແຫ່ງຊາດລາວ.

    ທ່ານນາງ ໃບຄໍາ ຂັດທິຍະ ໄດ້ມີຄຳເຫັນວ່າ: ບັນຫາຜົນກະທົບຕ່າງໆ ທີ່ເກີດຂື້ນອັນເນື່ອງມາຈາກການແຜ່ລະບາດຂອງ ພະຍາດCovid-19 ທີ່ແກ່ຍາວເວລາມາແລ້ວ 3 ປີ ທາງດ້ານແຮງງານການຮັບມືກັບພະຍາດດັ່ງກ່າວໄດ້ ເຮັດໃຫ້ບັນດາຫົວໜ່ວຍການຜະລິດ, ທຸລະກິດ ແລະ ການບໍລິການ ຫຼາຍແຫ່ງຖືກປິດລົງ ຫຼື ຖືກໂຈະ ໂດຍບໍ່ມີກຳນັດເວລາ ເຮັດໃຫ້ຜູ້ອອກແຮງງານລາວ ກໍຕ້ອງໄດ້ອອກຈາກ ຫຼື ໂຈະການເຮັດວຽກ ເປັນຈຳນວນຫຼວງຫຼາຍ ເຮັດໃຫ້ອັດຕາການວ່າງງານ ເພີ່ມ ຈາກ 9,7% ມາເປັນ 21,8% ໃນທ້າຍປີ 2021,

    ວຽກງານແຮງງານແມ່ນວຽກຫນຶ່ງ ທີ່ພັກ ແລະ ລັດຖະບານເຮົາ ຖຶເປັນວຽກທີ່ສຳຄັນ ແລະ ໄດ້ມອບໝາຍໃຫ້ພວກເຮົາສາມອົງການ ຈັດຕັ້ງປະຕິບັດຕາມພາລະບົດບາດ ແລະ ໜ້າທີ່ຂອງຕົນໃຫ້ໄດ້ເປັນຢ່າງດີ ແນໃສ່ການສ້າງຜົນປະໂຫຍດຮ່ວມກັນຕາມແນວທາງປ່ຽນໄປໃຫມ່ ຮອບດ້ານ ແລະ ມີຫລັກການຂອງພັກ ນັ້ນຄື ການສ້າງ ແລະ ພັດທະນາສີມືແຮງງານໃຫ້ສອດຄ່ອງກບຄວາມຕ້ອງການຂອງຕະຫຼາດແຮງງານ, ສົ່ງເສີມການມີວຽກເຮັດງານທຳ ທີ່ມີຄຸນຄ່າ ແລະ ເປັນທຳ, ຂະ ຫຍາຍການປົກຄຸມດ້ານການປະກັນສັງຄົມ, ເອົາໃຈໃສ່ປົກປ້ອງສິດ ແລະ ຜົນປະໂຫຍດຂອງຜູ້ໃຊ້ແຮງງານ ແລະ ຜູ້ອອກແຮງງານຕາມທີ່ກຳນົດໄວ້ໃນກົດໝາຍວ່າດ້ວຍແຮງງານ ທັງຫມົດນັ້ນແມ່ນເພື່ອກ້າວໄປສູ່ການບັນລຸຄາດໝາຍການພັດທະນາແບບຍືນຍົງ ໂດຍສະເພາະຄາດໝາຍທີ 8 ຂອງສາກົນ.

    ໃນກອງປະຊຸມປຶກສາຫາລືສາມຝ່າຍລະດັບສູງ ຄັ້ງທີ 19 ຜ່ານມາ ແມ່ນໄດ້ເຫັນດີເປັນເອກະພາບຮ່ວມກັນກຳນົດບັນດາໜ້າວຽກຕົ້ນຕໍ ທັງໝົດ 12 ໜ້າວຽກ, ໃນນັ້ນ ການປັບປຸງຄ່າແຮງງານຂັ້ນ ຕໍ່າສຸດໃຫ້ແກ່ຜູ້ອອກແຮງງານ ພາກວິສາຫະກິດ ເປັນບຸລິມະສິດໜຶ່ງທີ່ໄດ້ມີການຄົ້ນຄວ້າຄ່າແຮງງານຕໍ່ຳສຸດ, ເຊິ່ງຄະນະກຳມະການສາມຝ່າຍຂັ້ນສູນກາງ ໄດ້ດຳເນີນການຄົ້ນຄວ້າ ພິຈາລະນາການປັບປຸງຄ່າແຮງງານຂັ້ນຕ່ຳສຸດຢູ່ ສປປລາວ ໂດຍໄດ້ມອບໜ້າທີ່ໃຫ້ແຕ່ລະຝ່າຍດຳເນີນການຄົ້ນຄວ້າຄວາມເປັນໄປ ໄດ້ໃນການເພີ່ມຄ່າແຮງງານຂັ້ນຕ່ຳສຸດດັ່ງກ່າວ,

    ໂດຍເບື້ອງຕົ້ນຄາດວ່າຈະປັບຂຶ້ນໃນວັນທີ 1 ພຶດສະພາ 2022 ນີ້, ແຕ່ດ້ວຍເງື່ອນໄຂ ແລະ ຄວາມພ້ອມຕ່າງໆຍັງບໍ່ອຳນວຍ ທາງສະພາການຄ້າ ແລະ ອຸດສາຫະກຳແຫ່ງຊາດລາວ ຈຶ່ງສະເໜີຂໍເລື່ອນໄປເປັນວັນທີ 1 ເດືອນພຶດສະພາ 2023, ເຊິ່ງນັ້ນກໍເປັນພຽງຂໍ້ສະຫຼຸບ ທີ່ຍັງຕ້ອງສະເໜີໃຫ້ລັດຖະບານພິຈາລະນາຄືນອີກຄັ້ງໜຶ່ງ ກ່ອນຈະມີການປະກາດຢ່າງເປັນທາງການ.

    (ຂ່າວສານຮສສ)

    LEAVE A REPLY

    Please enter your comment!
    Please enter your name here