ເມືອງ ລະຄອນເພັງ ຫ້າມ ລ່າສັດນໍ້າ- ສັດປ່າໃນປ່າສະຫງວນ ໂດຍເດັດຂາດ

0
87

ອໍານາດການປົກຄອງ ເມືອງລະຄອນເພັງ ແຂວງສາລະວັນ ໄດ້ອອກຄໍາສັ່ງວ່າດ້ວຍການເພີ່ມທະວີຄວາມເຂັ້ມງວດ ການຄຸ້ມຄອງ, ປົກປັກຮັກສາປ່າສະຫງວນແຫ່ງຊາດ ໃນຂອບເຂດເມືອງລະຄອນເພັງ ເຖິງພໍ່ແມ່ປະຊາຊົນທົ່ວເມືອງລະຄອນເພັງ ໂດຍສະເພາະບ້ານທີ່ຕິດແປະປ່າສະຫງວນແຫ່ງຊາດ ພູຊຽງທອງ ແລະ ປ່າສະຫງວນແຫ່ງຊາດ ເຊບັ້ງນວນ, ເມື່ອບໍ່ດົນມານີ້ ວ່າ:

ຫ້າມອົງການຈັດຕັ້ງຂັ້ນຕ່າງໆ, ພໍ່ແມ່ປະຊາຊົນ ແລະ ນິຕິບຸກຄົນເຂົ້າໄປລ່າສັດນໍ້າ-ສັດປ່າ, ຈູດປ່າຂຸດຄົ້ນໄມ້, ເຄື່ອນຍ້າຍໄມ້, ເຄື່ອງປ່າຂອງດົງ ແລະ ນໍາເອົາສິ່ງຂອງທີ່ມີຄຸນຄ່າທາງຮ່ອງຮອຍດ້ານປະຫັວດສາດ ອອກຈາກປ່າ ສະຫງວນແຫ່ງຊາດ ຢ່າງເດັດຂາດ ແລະ ຫ້າມອົງການຈັດຕັ້ງຂັ້ນຕ່າງໆພະນັກງານ-ລັດຖະກອນ, ເຈົ້າໜ້າທີ່, ພໍ່ແມ່ປະຊາຊົນ ແລະ ນິຕິບຸກຄົນ ເຂົ້າໄປ ຈັບຈອງ, ບຸກລຸກຖາກຖາງປ່າໄມ້ ເພື່ອທຳການຜະລິດ ຫຼື ເຂົ້າໄປຕັ້ງຖີ່ນຖານທີ່ຖາວອນໃນຂອບເຂດປ່າສະ ຫງວນແຫ່ງຊາດ ໂດຍບໍ່ໄດ້ຮັບອະນຸຍາດຢ່າງເດັດຂາດ,

ຄໍາສັ່ງສະບັບດັ່ງກ່າວນີ້ ມອບໃຫ້ກອງຄຸ້ມຄອງປ່າສະຫງວນແຫ່ງຊາດສົມທົບກັບກໍາລັງ ປກຊ – ປກສ ແລະ ພາກສ່ວນທີ່ກ່ຽວຂ້ອງ ລົງເກັບກໍາຂໍ້ມູນ ແລະ ວັດແທກເນື້ອທີ່ໃຫ້ລະອຽດວ່າ ໃນແຕ່ລະບ້ານທີ່ພໍ່ແມ່ປະ ຊາຊົນ ໄດ້ເຂົ້າໄປທຳການຜະລີດ ມີຈັກຄອບຄົວ ເພື່ອສ້າງບົດບັນທືກໃຫ້ຢຸດເຊົາຢ່າງເດັດຂາດ, ພ້ອມທັງ ລົງກວດກາລາດຕະເວນຈຸດທີ່ຫຼ່ໍແຫຼມໃນຂອບເຂດປ່າສະຫງວນແຫ່ງຊາດໃຫ້ເປັນປົກກະຕິ, ຖ້າຫາກພົບເຫັນຜູ້ກະທຳຜິດ ແມ່ນໃຫ້ດຳເນີນການສືບສວນ-ສອບສວນຕາມກົດໝາຍ ແລະ ລະບຽບການຢ່າງເຂັມງວດ.

ການອອກຄໍາສັ່ງ ນີ້ ກໍເພື່ອເປັນການເພີ່ມທະວີ ໃນການຄຸ້ມຄອງ ແລະປົກປັກຮັກສາ ປ່າສະຫງວນແຫ່ງຊາດໃຫ້ມີຄວາມເຂັ້ມງວດ ຕາມກົດໝາຍ ແລະລະບຽບການໃຫ້ມີຄວາມສັກສິດ, ສະກັດກັ້ນ ແລະແກ້ໄຂປະກົດການຫຍໍ້ທໍ້ ເຊັ່ນ: ການບຸກລຸກຖາກຖາງ-ຈັບຈອງ, ການລັກລອບຂຸດຄົ້ນໄມ້, ການລ່າສັດ ແລະອື່ນໆ ທີ່ຂັດຕໍ່ກົດໝາຍ ໃນຂອບເຂດປ່າສະຫງວນແຫ່ງຊາດທີ່ນອນໃນຂອບເຂດເມືອງລະຄອນເພັງ ແຂວງສາລະວັນ.