ໂກງເງິນນາຍຈ້າງເກືອບ 1 ຕື້ກີບ ຍ້ອນການເບີກລ່ວງໜ້າຕະຫຼອດໆ

    0
    123

    ບໍ່ມີຫຍັງຊັບຊ້ອນ ຕັ້ງເຈດຕະນາຫຼອກລວງ ສຳລັບ ທ້າວ ພະຍັກ ຫຼື ກົບ ອາຍຸ 48 ປີ ກໍາມະກອນ ເຊື້ອຊາດ-ສັນຊາດໄທ ພັກເຊົາ ຢູ່ບ້ານໂພນທອງ ເມືອງໄຊເສດຖາ ນະຄອນຫຼວງວຽງຈັນ ໄດ້ສໍ້ໂກງຊັບພົນລະເມືອງ ລວມມູນຄ່າເສຍຫາຍເປັນເງິນ ຈໍານວນ 945 ລ້ານກີບ, ຖືກເຈົ້າໜ້າທີ່ ປກສ ເມືອງສີສັດຕະນາກ ກັກຕົວ ໃນວັນທີ 6 ມັງກອນ 2022 ມາດໍາເນີນການສອບສວນ.

    ຜ່ານການສືບສວນ-ສອບສວນ ຂອງເຈົ້າໜ້າທີ່ ປກສ ເມືອງສີສັດຕະນາກ ທ້າວພະຍັກ ຮັບສາລະພາບວ່າ: ໄດ້ສໍ້ໂກງຊັບພົນລະເມືອງແທ້ ເບື້ອງຕົ້ນໃນປີ 2019 ມີ ທ້າວຄໍາສອນ (ຜູ້ເສຍຫາຍ) ຕັ້ງອາພາດເມັ້ນ 8 ຊັ້ນ ຢູ່ບ້ານໂພນປາເປົ້າ ເມືອງສີສັດຕະນາກ ນວ

    ຈາກນັ້ນ ຜູ່ກ່ຽວໄດ້ຕິດຕໍ່ທາງໂທລະສັບມາຫາຕົນ ໃຫ້ເປັນຄົນຮັບເໝົາວຽກແກ້ວໂຊໜ້າອາພາດເມັ້ນ ຈໍານວນ 8 ຊັ້ນ ເລີ່ມແຕ່ຊັ້ນສອງຂຶ້ນໄປ ເປັນເງິນຈໍານວນ 525 ລ້ານກີບ ຕົນຈຶ່ງຂໍເອົາກ່ອນ 50% ເປັນເງິນຈໍານວນ 245 ລ້ານກີບ ຕໍ່ມາຕົນໄດ້ຮັບເໝົາວຽກຕື່ມອີກ ເປັນວຽກຕິດຕັ້ງປະຕູປ່ອງຢ້ຽມແກ້ວ ທີ່ເຮັດດ້ວຍຂອບ ຢູພີວີຊີ ຈໍານວນ 8 ຊັ້ນ ເປັນເງິນຈໍານວນ 1,4 ຕື້ກີບ ຂໍເອົາເງິນກ່ອນ 50% ເພື່ອໄປຊື້ວັດສະດຸ.

    ໃນວັນທີ 19 ຕຸລາ 2020 ໄດ້ເອົາເງິນສົດໄປ ຈໍານວນ 350 ລ້ານກີບ ແລະ ວັນທີ 26 ພະຈິກ 2020, ໄດ້ເອົາເງິນສົດຕື່ມອີກ ຈໍານວນ 350 ລ້ານລວມມູນຄ່າທັງໝົດເປັນເງິນຈໍານວນ 945 ລ້ານກີບ ແລະ ຕົນບໍ່ໄດ້ເຮັດວຽກຕາມສັນຍາ ທີ່ຕົກລົງກັນ ກັບຜູ້ເສຍຫາຍ.

    ຕົກມາໃນວັນທີ 6 ມັງກອນ 2022 ຕົນຈຶ່ງຖືກເຈົ້າໜ້າທີ່ ປກສ ເມືອງສີສັດຕະນາກ ກັກຕົວ.ປັດຈຸບັນຄະດີດັ່ງກ່າວ ເຈົ້າໜ້າທີ່ ປກສ ເມືອງສີສັດຕະນາກ ພວມດໍາເນີນຄະດີ ຕາມຂັ້ນຕອນຂອງກົດໝາຍ.
    ຈາກ: ປ້ອງກັນຄວາມສະຫງົບນະຄອນຫຼວງ

    LEAVE A REPLY

    Please enter your comment!
    Please enter your name here