ອະນຸມັດຖ້ຽວບິນເຂົ້າ-ອອກ ປະເທດແລ້ວ ແຕ່ມາດຕະການປ້ອງກັນໂຄວິດຍັງຕ້ອງຄົງໄວ້

    0
    162

    ສະພາບການລະບາດຂອງພະຍາດໂຄວິດ-19 ໃນຊຸມຊົນ ແມ່ນມີທ່າອ່ຽງຫຼຸດລົງຢ່າງຕໍ່ເນື່ອງ ໃນຂອບເຂດທົ່ວປະເທດ, ຫຼາຍວຽກງານເລີ່ມກັບເຂົ້າສູ່ສະພາບປົກກະຕິ ເຊິ່ງນັ້ນໄດ້ເປັນຜົນດີຕໍ່ ທຸກຂະແໜງການສາມາດເຄື່ອນໄຫວເຮັດທຸລະກິດການຜະລິດໄດ້ ລວມທັງຂະແໜງການຂົນສົ່ງໂດຍສານ ໂດຍສະເພາະທາງອາກາດ ທີ່ຕ້ອງໄດ້ມີການປັບປ່ຽນໄປຕາມສະພາບການທີ່ເປັນຢູ່.

    ທ່ານ ນາງ ທິບພະກອນ ຈັນທະວົງສາ, ຮອງລັດຖະມົນຕີ, ຮອງຫົວໜ້າຫ້ອງວ່າການສໍານັກງານນາຍົກລັດຖະມົນຕີ, ຮອງຫົວໜ້າຄະນະສະເພາະກິດ, ຜູ້ປະຈຳການ ໄດ້ກ່າວໃນຖະແຫຼງການທີ່ກະຊວງສາທາລະນະສຸກ ໃນວັນທີ 2 ມີນາ 2022 ນີ້ວ່າ: ລັດຖະບານເຫັນດີອະນຸຍາດໃຫ້ກະຊວງໂຍທາທິການ ແລະ ຂົນສົ່ງ ພິຈາລະນາອະນຸມັດ ຖ້ຽວບິນ ເຂົ້າ-ອອກ ສປປ ລາວໄດ້ ໂດຍບໍ່ຜ່ານຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ແຕ່ຕ້ອງຮັບປະກັນໃຫ້ບັນດາຖ້ຽວບິນທີ່ໄດ້ຮັບອະນຸຍາດ ປະຕິບັດມາດຕະການປ້ອງກັນ ແລະ ຄວບຄຸມການຕິດເຊື້ອ ຢ່າງເຂັ້ມງວດ.

    ພ້ອມກັນນີ້ ໃຫ້ມີກົນໄກການປະສານງານ ກັບ ກະຊວງສາທາລະນະສຸກ, ກະຊວງປ້ອງກັນຄວາມສະຫງົບ ແລະ ພາກສ່ວນກ່ຽວຂ້ອງ ກ່ອນອອກອະນຸຍາດທຸກຄັ້ງ ເພື່ອການຮັບປະກັນການກວດຫາເຊື້ອພະຍາດ COVID-19 ແລະ ການຈອງໂຮງແຮມຈຳກັດບໍລິເວນ ໃນໄລຍະລໍຖ້າຜົນກວດ. ສໍາລັບຄ່າໃຊ້ຈ່າຍໃນການຈໍາກັດບໍລິເວນ ແລະ ຄ່າກວດ PCR ແມ່ນໃຫ້ຜູ້ເດີນທາງເຂົ້າປະເທດຮັບຜິດຊອບເອງ.

    ທ່ານຍັງໃນເນັ້ນຕື່ມວ່າ: ຜູ້ໃດທີ່ຍັງບໍ່ທັນໄດ້ຮັບວັກຊີນ ຂໍໃຫ້ໄປຮັບວັກຊີນຕາມສະຖານບໍລິການ ທີ່ຄະນະສະເພາະກິດໄດ້ກຳນົດໄວ້ ເພື່ອສ້າງພູມຄຸ້ມກັນໃຫ້ຕົນເອງ ແລະ ພູມຄຸ້ມກັນໝູ່ໃຫ້ສັງຄົມ. ເມື່ອໄດ້ຮັບວັກຊີນແລ້ວ ໂອກາດຕິດເຊື້ອກໍ່ໜ້ອຍລົງ ຫຼື ຖ້າຕິດເຊື້ອ ກໍຊ່ວຍໃຫ້ອາການເຈັບປ່ວຍບໍ່ຮຸນແຮງ ແລະ ບໍ່ເສຍຊີວິດ ແລະ ສືບຕໍ່ເອົາໃຈໃສ່ປະຕິບັດມາດຕະການປ້ອງກັນການຕິດເຊື້ອ ແລະ ແຜ່ເຊື້ອ ທີ່ເປັນພື້ນຖານ ເປັນຕົ້ນ ໃສ່ຜ້າອັດປາກ-ດັງ, ໝັ່ນລ້າງມືດ້ວຍນໍ້າສະອາດ ໃສ່ສະບູ ຫຼື ເຈວລ້າງມື, ຮັກສາໄລຍະຫ່າງ, ໄປຮັບວັກຊີນໃຫ້ຄົບ ລວມທັງ ເຂັມກະຕຸ້ນ.

    .

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.