ການນຳໃຊ້ລົດລັດບໍ່ຖືກລະບຽບແມ່ນບັນຫາໜຶ່ງທີ່ລັັດຖະບານຈະສຸມໃສ່ແກ້ໄຂໃນເດືອນມີນານີ້

0
95

ຄະນະລັດຖະບານນໍາໂດຍທ່ານພັນຄໍາ ວິພາວັນ ນາຍົກລັດຖະມົນຕີຈະໄດ້ສືບຕໍ່ແກ້ໄຂຫຼາຍວຽກງານໃນເດືອນມີນາ 2022 ທີ່ຈະມາເຖິງນີ້ ຄຽງຄູ່ກັບການດຳເນີນມາດຕະການປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໂດຍຈະໄດ້ສືບຕໍ່ສຸມໃສ່ຊຸກຍູ້ ແລະ ຕິດຕາມການຈັດຕັ້ງປະຕິບັດ 2 ວາລະແຫ່ງຊາດ ໃຫ້ເປັນຮູບປະທໍາຫຼາຍຂຶ້ນ ໃນນີ້ຈະສຸມໃສ່ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ການນຳໃຊ້ລົດລັດ, ການແກ້ໄຂລົດທີ່ນຳໃຊ້ບໍ່ຖືກຕ້ອງຕາມກົດໝາຍ, ການແກ້ໄຂຄວາມຫຍຸ້ງຍາກໃນການດຳເນີນທຸລະກິດ, ການຂຸດຄົ້ນແຮ່ທາດ, ການສົ່ງອອກສິນຄ້າຢູ່ດ່ານຊາຍແດນ ແລະ ບັນຫາທີ່ດິນ ແລະ ອື່ນໆ ຊຶ່ງບັນດາວຽກງານດັ່ງກ່າວມານີິ້ ຄະນະລັດຖະບານໄດ້ມີການປຶກສາຫາລື ແລະ ຕົກລົງກັນຮັບເອົາເພື່ອໃຫ້ຈັດຕັ້ງປະຕິບັດໃນເດືອນດັ່ງກ່າວທີ່ກອງປະຊຸມລັດຖະບານສະໄໝສາມັນ ປະຈໍາເດືອນກຸມພາ ປີ 2022 ທີ່ໄດ້ຈັດຂຶ້ນໃນລະຫວ່າງວັນທີ 21 ຫາ 22 ກຸມພາ 2022 ທີ່ຜ່ານມາຢູ່ ທີ່ສໍານັກງານນາຍົກລັດຖະມົນຕີ ພາຍໃຕ້ການເປັນປະທານຂອງ ທ່ານ ພັນຄໍາ ວິພາວັນ ນາຍົກລັດຖະມົນຕີ.

ບັນດາວຽກງານຈຸດສຸມລະອຽດທີ່ລັດຖະບານຈະປະຕິບັດໃນເດືອນໜ້ານີ້ປະກອບມີດັ່ງນີ້:ຂົງເຂດປ້ອງກັນຊາດ-ປ້ອງກັນຄວາມສະຫງົບ ແມ່ນຈະສືບຕໍ່ປະຕິບັດແນວທາງ ປກຊ-ປກສ ທົ່ວປວງຊົນຮອບດ້ານຢ່າງຕັ້ງໜ້າ ໂດຍສົມທົບແໜ້ນໃນການເຄື່ອນໄຫວຂອງກຳລັງທຸກຂັ້ນ ກັບການມີສ່ວນຮ່ວມຂອງປະຊາຊົນຢ່າງເປັນປົກ ກະຕິ ແລະ ຕໍ່ເນື່ອງ ລວມທັງການປ້ອງກັນສະຖານທີ່ສຳຄັນຕ່າງໆ,

ປະຕິບັດວາລະແຫ່ງຊາດ ວ່າດ້ວຍການແກ້ໄຂບັນ ຫາຢາເສບຕິດໃຫ້ເຂົ້າສູ່ລວງເລິກ ແລະ ເປັນຮູບປະທໍາຫຼາຍຂຶ້ນ; ຂົງເຂດເສດຖະກິດຈະສືບຕໍ່ສຸມໃສ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດປີ 2022 ແລະ ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນຢ່າງແຂງແຮງ ແລະ ໄດ້ຮັບຜົນດີກວ່າເກົ່າ, ໃນນີ້ເລັ່ງທວງໃຫ້ມີການຫັນເປັນວຽກລະອຽດຂອງແຕ່ລະຂະແໜງການໃຫ້ມີຄວາມຊັດເຈນ; ເອົາໃຈໃສ່ແກ້ໄຂສິ່ງກີດຂວາງຕ່າງໆໃຫ້ແກ່ການລົງທຶນພາຍໃນ ແລະ ຕ່າງປະເທດໃຫ້ມີການຫັນປ່ຽນຢ່າງຈະແຈ້ງ ແລະ ມີປະສິດທິຜົນສູງຂຶ້ນ, ເລັ່ງຈັດຕັ້ງປະຕິບັດບັນດາໂຄງການແຮ່ທາດ, ການເຮັດທົດລອງທຸລະກິດດີຈິຕອນ ແລະ ບັນດາໂຄງການທີ່ລັດຖະບານ ໄດ້ອະນຸຍາດໃຫ້ເຮັດທົດລອງໄປແລ້ວນັ້ນໃຫ້ມີຄວາມຄືບໜ້າແລະມີປະສິດທິຜົນ;

ສືບຕໍ່ປະຕິບັດມາດຕະການຄຸ້ມຄອງການຈັດເກັບລາຍຮັບພາສີ, ອາກອນ ແລະ ຄ່າບໍລິການຕ່າງໆຕາມທິດຫັນເປັນທັນສະໄໝ, ສືບຕໍ່ປະຕິບັດຄຳສັ່ງຂອງນາຍົກລັດຖະມົນຕີວ່າດ້ວຍການກວດກາ ແລະ ປະຕິບັດມາດຕະການຕໍ່ຜູ້ທີ່ນໍາເຂົ້າ ແລະ ນໍາໃຊ້ຍານພາຫະນະທຸກປະເພດແບບບໍ່ຖືກຕ້ອງ ໃຫ້ສໍາເລັດ ລວມທັງເລັ່ງຜັນຂະຫຍາຍນິ ຕິກຳວ່າດ້ວຍການນຳໃຊ້ລົດລັດໃນຂອບເຂດທົ່ວປະເທດ ໃຫ້ເປັນຮູບປະທຳ ແລະ ສົ່ງເສີມ ການນໍາໃຊ້ລົດໄຟຟ້າ, ເພີ່ມທະວີຄວາມເອົາໃຈໃສ່ໃນການສົ່ງເສີມການຜະລິດ, ການປຸງ ແຕ່ງ, ການຄ້າ, ການບໍລິການ ແລະ ການທ່ອງທ່ຽວປິ່ນອ້ອມແລວທາງເສດຖະກິດລົດໄຟລາວ-ຈີນ ໃຫ້ຮັບປະກັນທາງດ້ານປະລິມານ ແລະ ຄຸນນະພາບ; ສືບຕໍ່ພົວພັນ ແລະ ປຶກ ສາຫາລືກັບປະເທດໃກ້ຄຽງ ເພື່ອສ້າງສະພາບແວດລ້ອມທີ່ສະດວກໃຫ້ແກ່ການນຳເຂົ້າ-ສົ່ງອອກສິນຄ້າໃຫ້

ດີຂຶ້ນ; ຈະເພີ່ມຄວາມເອົາໃຈໃສ່ຄຸ້ມຄອງ ແລະ ຮັກສາສະຖຽນລະພາບດ້ານເງິນຕາໃຫ້ມີຄວາມໝັ້ນທ່ຽງ ແລະ ອັດຕາແລກປ່ຽນເໜັງຕີງໃນລະດັບທີ່ກໍານົດໄວ້ຕິດພັນກັບການເອົາໃຈໃສ່ຄຸ້ມຄອງການເຄື່ອນໄຫວຂອງທະນາຄານທຸລະກິດ, ສະຖາບັນການເງິນປະຕິບັດມາດຕະການຕາມກົດໝາຍ, ລະບຽບການ ແລະ ຕາມແຜນທີ່ໄດ້ກຳນົດໄວ້; ສືບຕໍ່ເອົາໃຈໃສ່ຄຸ້ມຄອງລາຄາສິນຄ້າອຸປະໂພກ-ບໍລິໂພກ ແລະ ລາຄານໍ້າມັນຢ່າງເຂັ້ມງວດພ້ອມທັງຊຸກຍູ້, ສົ່ງເສີມການຜະລິດ ແລະ ສົ່ງເສີມການຊົມໃຊ້ສິນຄ້າພາຍໃນໃຫ້ຫຼາຍຂຶ້ນ; ສືບຕໍ່ປັບປຸງແກ້ໄຂກົນໄກການຂຶ້ນທະບຽນ ແລະ ອອກໃບຕາດິນໃນຂອບເຂດທົ່ວປະ ເທດໃຫ້ມີຄວາມສະດວກວ່ອງໄວ ແລະ ຮັບປະກັນຄວາມຖືກຕ້ອງ; ສືບຕໍ່ປັບປຸງ ແລະ ຍົກສູງຄຸນນະພາບການບໍລິການຜູ້ໂດຍສານທາງລົດໄຟ ແລະ ການບໍລິການຂົນສົ່ງສິນຄ້າໃຫ້ສະດວກ, ວ່ອງໄວ ແລະ ມີປະສິດທິຜົນສູງຂຶ້ນ.

ສະເພາະຂົງເຂດວັດທະນະທຳ-ສັງຄົມລັດຖະບານຈະສືບຕໍ່ເປີດການຮຽນ-ການສອນໃນສະຖານການສຶກສາ ແລະ ປຸກລະດົມນັກຮຽນ-ນັກສຶກສາຕາມເກນອາຍຸ ທີ່ກະຊວງສາທາລະນະສຸກກຳນົດໄວ້ໃຫ້ໄປຮັບການສັກວັກຊິນໃຫ້ຫຼາຍຂຶ້ນ, ພ້ອມທັງ ປັບປຸງວັດຈະນານຸກົມ ພາສາລາວ ໃຫ້ສຳເລັດ; ສືບຕໍ່ຕິດຕາມ ແລະ ຊຸກຍູ້ການຈັດຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ແລະ ປັບປຸງແກ້ໄຂຂັ້ນຂອດໃນການຂໍອະນຸມັດເຂົ້າ-ອອກປະເທດຂອງນັກລົງທຶນ, ວິຊາການ, ນັກທ່ອງທ່ຽວ ແລະ ເປົ້າໝາຍອື່ນໆຢູ່ປະເທດເຮົາໃຫ້ດີຂຶ້ນ ເພື່ອຟື້ນຟູເສດຖະກິດຂອງປະເທດ; ສຸມໃສ່ຕະລຸມບອນການສັກວັກຊິນຕາມແຈ້ງການເລກທີ 221/ຫສນຍລົງວັນທີ 18 ກຸມພາ 2022 ໃຫ້ສຳເລັດ, ຜະລິດຢາປົວພະຍາດໂຄວິດ-19 ໃຫ້ພຽງພໍ; ສືບຕໍ່ເອົາໃຈໃສ່ຊຸກຍູ້ການປະຕິບັດພາລະບົດບາດຂອງຂະແໜງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຕິດພັນກັບການສືບຕໍ່ກະກຽມຄວາມພ້ອມຮອບດ້ານ ເພື່ອຕ້ອນຮັບເອົານັກທ່ອງທ່ຽວເຂົ້າມາປະເທດໃຫ້ບັນລຸຕາມແຜນການ ແລະ ໄດ້ຮັບຜົນດີ; ສືບຕໍ່ຕິດຕາມເຝົ້າລະວັງການ ລະບາດພະຍາດລະດູການ ເພື່ອສະໜອງຂໍ້ມູນຂ່າວສານ ແລະ ກະກຽມຄວາມພ້ອມໃນດ້ານຕ່າງໆເພື່ອຮັບມືໃຫ້ທັນສະພາບການ.

ຂົງເຂດການປົກຄອງ ແລະ ຍຸຕິທໍາລັດຖະບານຈະສືບຕໍ່ກະກຽມຄວາມພ້ອມຮອບດ້ານ ຂອງບັນດາຮ່າງກົດໝາຍສ້າງໃໝ່ ແລະ ຮ່າງກົດໝາຍສະບັບປັບປຸງ ທີ່ຂະແໜງການຕົນຮັບຜິດຊອບຕາມແຜນການສ້າງ ແລະ ປັບປຸງກົດໝາຍປະຈໍາປີ 2022 ຂອງສະພາແຫ່ງຊາດ ເພື່ອໃຫ້ທັນນໍາສະເໜີກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໄດ້ພິຈາລະນາຕາມແຜນທີ່ວາງໄວ້; ສືບຕໍ່ສຸມໃສ່ແກ້ໄຂບັນຫາຕ່າງໆທີ່ພົວພັນເຖິງຂໍ້ຂັດແຍ້ງໃນສັງຄົມ ລວມທັງການຈັດຕັ້ງປະຕິບັດຄໍາຕັດສິນຂອງສານ ແລະ ອື່ນໆໃຫ້ໄດ້ຮັບຜົນດີກວ່າເກົ່າ; ສືບຕໍ່ສຸມໃສ່ກະກຽມ ແລະ ດຳເນີນກອງປະຊຸມທົ່ວປະເທດ ເພື່ອສະຫຼຸບຕີລາຄາ ການຈັດຕັ້ງປະຕິບັດ ຂະບວນການແຂ່ງຂັນຮັກຊາດ ແລະ ພັດທະນາ ຕິດພັນກັບການຜັນຂະຫຍາຍວຽກງານ 3 ສ້າງ ເຂົ້າສູ່ລວງເລິກ ໃນໄລຍະ ປີ 2016-2020

ແລະ ວາງທິດທາງ 2021-2025; ປັບປຸງແບບແຜນລົງເຄື່ອນໄຫວວຽກງານຢູ່ທ້ອງຖິ່ນຂອງນາຍົກ-ຮອງນາຍົກລັດຖະມົນຕີ ແລະ ລັດຖະມົນຕີບັນດາກະຊວງ ໂດຍການລົງເຜີຍແຜ່ບັນດານິຕິກຳຂອງລັດຖະບານໃຫ້ເຂົ້າໃຈ ແລະ ການແກ້ໄຂວຽກຕົວຈິງຢູ່ທ້ອງຖິ່ນ. ວຽກງານການຕ່າງປະເທດລັດຖະບານຈະສືບຕໍ່ຕິດຕາມສະພາບການພາກພື້ນ ແລະ ສາກົນໂດຍມີການວິເຄາະວິໄຈຢ່າງເລິກ ເຊິ່ງກ່ຽວກັບຄວາມສ່ຽງ ແລະ ທ່າອ່ຽງຂອງຜົນກະທົບທາງດ້ານການເມືອງ, ເສດຖະກິດ ແລະ ສັງຄົມທີ່ມີຕໍ່ປະເທດເຮົາທັງມີມາດຕະການຮັບມືທີ່ເປັນລະບົບຮັດກຸມ ແລະ ທັນການ; ສືບຕໍ່ຜັນຂະຫຍາຍຜົນສໍາເລັດການ ເຄື່ອນໄຫວຢ້ຽມຢາມ ສສ ຫວຽດນາມ ແລະ ກອງປະຊຸມຄະນະກໍາມະການຮ່ວມມືທະວີພາຄີລະຫວ່າງລັດຖະບານແຫ່ງ ສປປ ລາວ ແລະ ສສ ຫວຽດນາມ ຄັ້ງທີ 44 ແລະ ຈັດຕັ້ງປະຕິບັດຜົນຂອງການພົບປະ ລະຫວ່າງການນໍາພັກ-ລັດເຮົາ ກັບບັນດາປະເທດເພື່ອນມິດໃຫ້ຖືກຕ້ອງ-ທັນການແລະໄດ້ຮັບຜົນດີ.

ຂໍ້ມູນ: ຫ້ອງວ່າການສໍານັກງານນາຍົກລັດຖະມົນຕີ