ຜູ້ອາຍຸສູງ ແລະ ມີພະຍາດປະຈຳຕົວ ແມ່ນກຸ່ມສ່ຽງທີ່ຈະເສຍຊີວິດຖ້າຕິດເຊື້ອໂ ຄ ວິ ດ-19

0
131

ທ່ານ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ລາຍງານໃນວັນທີ 19 ກຸມພາ 2022 ນີ້ວ່າ: ຜົນການສຶກສາຄົ້ນຄວ້າຈາກສູນຄວບຄຸມ ແລະ ປ້ອງກັນພະຍາດຂອງສະຫະລັດອາເມລິກາ (CDC) ເປີດເຜີຍວ່າ: ຜູ້ອາຍຸສູງ ຖ້າຕິດເຊື້ອພະຍາດໂຄວິດ-19 ມີຄວາມສ່ຽງທີ່ຈະເສຍຊີວິດຫລາຍກວ່າກຸ່ມອາຍຸໜ້ອຍ. ສະນັ້ນ, ຍິ່ງອາຍຸຫລາຍຂຶ້ນຄວາມສ່ຽງກໍຈະຍິ່ງສູງຂຶ້ນ ເຊັ່ນ: ກຸ່ມອາຍຸ 65-74 ປີ ມີຄວາມສ່ຽງເສຍຊີວິດຫລາຍກວ່າ ກຸ່ມອາຍຸ 18-29 ປີ ເຖິງ 65 ເທົ່າ; ສ່ວນກຸ່ມອາຍຸ 75-84 ປີ ມີຄວາມສ່ຽງທີ່ຈະເສຍຊີວິດຫລາຍກວ່າ 140 ເທົ່າ; ສຳລັບກຸ່ມອາຍຸ 85 ປີຂຶ້ນໄປ ມີຄວາມສ່ຽງທີ່ຈະເສຍຊີວິດຫລາຍກວ່າ 340 ເທົ່າ.

ດັ່ງນັ້ນ, ອາຍຸ ຈຶ່ງຖືວ່າເປັນປັດໄຈສ່ຽງ ທີ່ມີຄວາມສຳຄັນຫລາຍລວມໄປເຖິງຜູ້ທີ່ມີພະຍາດປະຈຳໂຕ ເປັນ ຕົ້ນ ພະຍາດຕຸ້ຍ, ພະຍາດເບົາຫວານ, ພະຍາດປອດ, ພະຍາດໄຂ່ຫລັງ, ພະຍາດສະໝອງ, ພະຍາດຫົວ ໃຈ ເຖິງວ່າ ສາຍພັນໂອໄມຄຣອນ ຄວາມຮຸນແຮງອາດຈະບໍ່ເທົ່າສາຍພັນເດວຕ້າກໍ່ຕາມ, ແຕ່ຖ້າຜູ້ອາຍຸສູງ ທີ່ບໍ່ທັນໄດ້ສັກວັກຊີນ ເມື່ອຕິດເຊື້ອ ມີໂອກາດສູງທີ່ເຊື້ອຈະລົງປອດເຮັດໃຫ້ປອດອັກເສບ, ລະບົບຫາຍໃຈຫລົ້ມແຫລວ ແລະ ເສຍຊີວິດໄດ້.

ພ້ອມກັນນີ້, ການສັກວັກຊີນປ້ອງກັນໂຄວິດ-19 ຍັງແມ່ນວິທີດີທີ່ສຸດໃນການປ້ອງກັນເພື່ອສ້າງພູມຄຸ້ມກັນໃຫ້ແກ່ຮ່າງກາຍ ເຊິ່ງມາຮອດມື້ນີ້ ທົ່ວປະເທດລາວ ສັກວັກຊີນ ເຂັມທີ 1 ໄດ້ 4.836.885 ຄົນກວມ 65,92% ແລະ ສັກທຸກເຂັມທີ່ແນະນໍາ 4.268.613 ຄົນກວມ 58,17%.