ລາວ ຈະສົ່ງນັກກິລາກາຣາເຕໂດຮ່ວມ ແຂ່ງຂັນ 3 ລາຍການໃຫຍ່ ທີ່ຕ່າງປະເຫດ

0
112

ສະຫະພັນກິລາກາຣາເຕໂດແຫ່ງຊາດລາວ ຈະສົ່ງນັກກິລາທີມຊາດກາຣາເຕໂດ ຈຳນວນ 7 ຄົນ, ຍິງ 3 ຄົນ ເຂົ້າຮ່ວມແຂ່ງຂັນ 3 ລາຍການໃຫຍ່ ທີ່ຕ່າງປະເຫດ ປະກອບມີ: ງານແຂ່ງຂັນກິລາກາຣາເຕໂດ ຊີງແຊ໋ມອາຊີຕາເວັນອອກສຽງໃຕ້ ຫຼື ອາຊຽນ ໃນລະຫວ່າງວັນທີ 21-27 ມີນາ 2022 ທີ່ປະເທດກຳປູເຈຍ, ງານມະຫະກຳກິລາຊີເກມຄັ້ງທີ 31ໃນລະຫວ່າງ ວັນທີ 12-23 ພຶດສະພາ 2022 ທີ່ ສສ ຫວຽດນາມ ແລະ ງານກິລາເອຊຽນເກມ ຄັ້ງທີ 18 ໃນລະຫວ່າງວັນທີ 10-25 ກັນຍາ 2022 ທີ່ ສປ ຈີນ.

ສໍາລັບ ນັກກິລາທີມຊາດກາຣາເຕໂດ ຈຳນວນ 7 ຄົນ ປະກອບມີ ປະເພດຕໍ່ສູ້ປ້ອງກັນຕົວ ຍິງ ຮຸ່ນນໍ້າໜັກ -50 ກິໂລ, -55 ກິໂລ ແລະ -61 ກິໂລ, ສ່ວນປະເພດຕໍ່ສູ້ປ້ອງກັນຕົວ ຊາຍ ມີຮຸ່ນນໍ້າໜັກ -60 ກິໂລ, -67, -84 ກິໂລ ແລະ ປະເພດຟ້ອນ KATA, ຊຶ່ງນັກກິລາດັ່ງກ່າວນີ້ ແມ່ນໄດ້ຖຶກຄັດເລືອກ ເມື່ອບໍ່ດົນມານີ້ ຢູ່ທີ່ສະໂມສອນກາຣາເຕໂດ ສັບພະວິຊາ ນະຄອນຫຼວງວຽງຈັນ ໂດຍການເຂົ້າຮ່ວມເປັນປະທານຂອງ ທ່ານ ພົງສະຫວັດ ບຸບຜາ ປະທານສະຫະພັນກິລາກາຣາເຕໂດແຫ່ງຊາດລາວ ແລະ ທ່ານ ສອນສັກ ນໍຍານຊະນະ ເລຂາທິການສະຫະພັນກິລາກາຣາເຕໂດແຫ່ງຊາດລາວ ພ້ອມດ້ວຍພາກສ່ວນທີ່ກ່ຽວຂ້ອງ.