ຊາຍຊາວຕວກກີກວດໂ ຄ ວິ ດ 78 ຄັ້ງ ຜົນບວກທຸກຄັ້ງ ຕ້ອງກັກຕົວ 14 ເດືອນ

0
109

ສຳນັກຂ່າວ The National News ລາຍງານໂດຍອ້າງເວັບໄຊ Covid-19 ຢ່າງເປັນທາງການຂອງຕວກກີວ່າ: ຊາວຊາວຕວກກີຕ້ອງກັກຕົວທັງຢູ່ໂຮງໝໍ ແລະ ຢູ່ເຮືອນມາ 14 ເດືອນແລ້ວ ຫລັງຈາກຜົນກວດຫາໂຄວິດ-19 ອອກມາເປັນບວກທັງ 78 ຄັ້ງ.

ມຸສຊາເຟີ ຄາຍາຊານ ເຊິ່ງເປັນຜູ້ປ່ວຍພະຍາດລູຄີເມຍ ຕິດໂຄວິດ-19 ຄັ້ງທຳອິດໃນເດືອນພຶດສະພາ 2020 ແລະ ຕ້ອງເຂົ້າຮັບການປິ່ນປົວໃນໂຮງໝໍ ຈາກນັ້ນອອກຈາກໂຮງໝໍກັບເຮືອນຢູ່ເມືອງອິສຕັນບູລໃນອີກ 2 ອາທິດຕໍ່ມາ, ແຕ່ການຕິດໂຄວິດ-19 ຄັ້ງນີ້ຖືເປັນຈຸດປ່ຽນຊີວິດ ແລະ ເປັນຈຸດເລີ່ມຕົ້ນຂອງການກັກຕົວກວ່າ 1 ປີໃນຄັ້ງນີ້.

ຕາມມາດຕະການຂອງຕວກກີຄື: ຜູ້ຕິດເຊື້ອໂຄວິດ-19 ຕ້ອງກັບໄປກັກຕົວຢູ່ເຮືອນຕໍ່ອີກ 2 ອາທິດ ແລະ ຕ້ອງມີຜົນການກວດຫາເຊື້ອເປັນລົບຈຶ່ງຈະສິ້ນສຸດການກັກຕົວ.

ສຳນັກຂ່າວທ້ອງຖິ່ນ Ihlas ລາຍງານວ່າ: ກໍລະນີຂອງ ຄາຍາຊານ ການກວດຫາເຊື້ອທັງ 78 ຄັ້ງອອກມາເປັນບວກທຸກຄັ້ງ ຈົນລາວຕ້ອງຖືກກັກຕົວຢ່າງໂດດດ່ຽວໃນໂຮງໝໍເຖິງ 9 ເດືອນ ແລະ ຢູ່ເຮືອນອີກ 5 ເດືອນ ໂດຍເຮັດໄດ້ພຽງເບິ່ງໜ້າລູກຫລານຜ່ານປ່ອງຢ້ຽມເທົ່ານັ້ນ ລາວຈຶ່ງຂໍໃຫ້ທາງການຫາທາງຊ່ວຍເຫລືອໃຫ້ກັບໄປໃຊ້ຊີວິດຕາມປົກກະຕິ.

ຄາຍາຊານ ກ່າວວ່າ: “ຂ້ອຍຫາຍແລ້ວ ແຕ່ຍັງມີເຊື້ອຫລົງເຫລືອໃນຮ່າງກາຍ ນີ້ເປັນຄຳອະທິບາຍດຽວທີ່ຂ້ອຍໄດ້ຮັບຫລັງຜົນກວດເປັນບວກ ຂ້ອຍບໍ່ມີບັນຫາຫຍັງນອກຈາກຈະບໍ່ສາມາດສຳຜັດຄົນທີ່ຂ້ອຍຮັກໄດ້ ມັນຍາກ ຂ້ອຍສັກວັກຊີນບໍ່ໄດ້ເພາະອາການປ່ວຍຂອງຂ້ອຍ”

ແພດທີ່ປິ່ນປົວ ຄາຍາຊານ ແຈ້ງວ່າ: ຜົນກວດຫາເຊື້ອອກມາເປັນບວກທຸກຄັ້ງເປັນຍ້ອນພູມຕ້ານທານອ່ອນແອ ເນື່ອງຈາກອາການປ່ວຍລູຄີເມຍ ແລະ ຕ້ອງອາໄສຢາທີ່ແພດເອົາໃຫ້ເພື່ອໃຫ້ພູມຕ້ານທານແຂງແຮງຂຶ້ນ.

ຂະນະທີ່ພັນລະຍາຂອງ ຄາຍາຊານ ເຊິ່ງອາໄສຢູ່ໃນເຮືອນດຽວກັນໄລຍະທີ່ຜົວກັກຕົວມີຜົນການກວດຫາເຊື້ອເປັນລົບທັງສອງຄັ້ງ ເຊັ່ນດຽວກັບລູກຊາຍທີ່ຢູ່ໃກ້ຊິດກັບ ຄາຍາຊານ.