ກຽມໄປທ່ຽວງານບຸນ ພະທາດສີໂຄດຕະບອງ ປີນີ້ຈັດໃຫຍ່ກວ່າປີຜ່ານມາ

    0
    195

    ພະທາດສີໂຄດ ເປັນປູສະນີຍະສະຖານ ແລະ ທັງເປັນສັນຍາລັກຂອງແຂວງຄຳມ່ວນ ຕັ້ງຢູ່ເຂດບ້ານ ສີໂຄດ, ເມືອງທ່າແຂກ ແຂວງຄຳມ່ວນ ແລະ ຕັ້ງຢູ່ແຄມແມ່ນໍ້າຂອງ ຫ່າງຈາກຕົວເມືອງໄປທາງທິດໃຕ້ 6 ກິໂລແມັດ ສ້າງຂຶ້ນໃນສະໄໝອານາຈັກ ສີໂຄດຕະບອງ ສັດຕະວັດທີ 6-8 ເຊິ່ງເປັນບ່ອນບັນຈຸອັດຖິ( ກະດູກ) ຂອງອົງສຳມາສຳພະພຸດທະເຈົ້າ. ທຸກປີຂອງເດືອນ 3 ລາວ ກໍ່ໄດ້ມີງານບຸນນະມັດສະການອົງພະທາດ ເຊິ່ງປີນີ້ແມ່ນກຳນົດລະຫວ່າງ 13-16 ກຸມພາທີ່ຈະມາເຖິງນີ້.

    ແຂວງຄໍາມ່ວນ ກະກຽມຈະຈັດບຸນນະມັດສະການພະທາດສີໂຄດຕະບອງ ຢູ່ເມືອງທ່າແຂກ ປະຈໍາປີ 2022 ໃນມື້ຂຶ້ນ 13-15 ຄໍ່າ, ເຊີ່ງກົງກັບວັນທີ 13-16 ກຸມພານີ້ ເພື່ອຟື້ນຟູການທ່ອງທ່ຽວພາຍໃນແຂວງ ແລະ ກຽມໃສ່ການເປີດການທ່ອງທ່ຽວສີຂຽວ ໄລຍະທີ 2 ຂອງລັດຖະບານ, ແຕ່ເດັດຂາດບໍ່ໃຫ້ມີການຈໍາໜ່າຍເຄື່ອງດື່ມທີ່ມີທາດເຫລົ້າ ແລະ ປະຕິບັດມາດຕະການປ້ອງກັນພະຍາດໂຄວິດ-19 ຢ່າງເຂັ້ມງວດ.

    ​      ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນ ໃຫ້ສໍາພາດຕໍ່ສື່ມວນຊົນ ໃນວັນທີ 4 ກຸມພາ 2022 ວ່າ: ປັດຈຸບັນ, ການລະບາດຂອງພະຍາດໂຄວິດ-19 ຢູ່ແຂວງຄໍາມ່ວນ ຜ່ອນຄາຍລົງຫລາຍແລ້ວ ເຮັດໃຫ້ອົງການປົກ ຄອງແຂວງແຕ່ງຕັ້ັ້ງຄະນະຮັບຜິດຊອບຂັ້ນແຂວງ ແລະ ເມືອງ ກໍຄື ເມືອງທ່າແຂກ ເພື່ອກະກຽມຈັດບຸນນະມັດສະການພະທາດສີໂຄດຕະບອງ ປະຈໍາປີ 2022 ໂດຍໄດ້ປຶກສາຫາລືຮ່ວມກັນແລ້ວກ່ຽວກັບການກໍານົດກິດຈະກໍາພາຍໃນງານປີນີ້ຈະຈັດຂຶ້ນໃຫຍ່ກວ່າປີຜ່ານມາ .

    ງານບຸນປີນີ້ຈະປະກອບດ້ວຍຫລາຍກິດຈະກໍາ ເປັນຕົ້ນ: ກິດຈະກໍາທາງສາສະໜາທີ່ຂາດບໍ່ໄດ້ ຄື: ການຟັງທໍາມະເທດສະໜາ, ແຫ່ຜາສາດເຜີ້ງ ແລະ ການໃສ່ບາດຢາດນໍ້າ. ນອກຈາກນີ້ ຈະມີການວາງສະແດງຂາຍສິນຄ້າຫັດຖະກໍາ ກໍຄື ເຄື່ອງໃຊ້ສອຍຕ່າງໆ, ແຂ່ງຂັນກິລາບາງປະເພດທີ່ເຄີຍປະຕິບັດສືບທອດກັນມາ, ແຂ່ງຂັນກອງແຕ້-ກອງຈິງ, ແຂ່ງຂັນຂັບລໍາມະຫາໄຊ ເພື່ອສ້າງຮຸ່ນສືບທອດ ແລະ ກິດຈະກໍາອື່ນໆ, ແຕ່ໃນນີ້ ມີບາງກິດຈະກໍາກິລາທີ່ແຂ່ງຂັນ ເປັນໝູ່ຄະນະ ໂດຍສະເພາະກິລາບານເຕະ ຈະຈໍາກັດທີມເຂົ້າຮ່ວມແຂ່ງຂັນເພື່ອບໍ່ໃຫ້ຫລາຍເກີນໄປ.

    ນອກຈາກນີ້ ພາຍໃນງານຈະອະນຸຍາດໃຫ້ມີການຫລີ້ນດົນຕຣີທີ່ຕິດພັນກັບການສະແດງສິລະປະເທົ່ານັ້ນ, ແຕ່ບໍ່ອະນຸຍາດໃຫ້ຫລີ້ນດົນຕຣີທີ່ຕິດພັນກັບການຈໍາໜ່າຍເຄື່ອງດື່ມທີ່ມີທາດເຫລົ້າ ຫລື ມີການຈໍາໜ່າຍເຄື່ອງດື່ມທີ່ມີທາດເຫລົ້າພາຍໃນງານຢ່າງເດັດຂາດ.

    ​      ທ່ານຮອງເຈົ້າແຂວງຄໍາມ່ວນ ໃຫ້ຮູ້ຕື່ມວ່າ: ສໍາລັບການປ້ອງກັນພະຍາດໂຄວິດ-19 ພາຍໃນງານຄັ້ງນີ້. ຄະນະຮັບຜິດຊອບຈັດງານໄດ້ຖອດຖອນບົດຮຽນຈາກປີຜ່ານມາ ໂດຍຈະຕິດຕັ້ງການກວດກາວັດແທກອຸນຫະພູມ ແລະ ປະກອບເຈວລ້າງມືຢູ່ທຸກຈຸດເຂົ້າຫາພະທາດສີໂຄດຕະບອງ, ໃຫ້ທຸກຄົນທີ່ໄປຮ່ວມງານໃສ່ຜ້າອັດປາກ-ດັງ, ການຈັດໄລຍະຫ່າງບ່ອນວາງສະແດງຂາຍສິນຄ້າ, ການຮັກສາໄລຍະຫ່າງໃນເວລາແຫ່ຜາສາດເຜີ້ງ ແລະ ອື່ນໆ.

    ຮູບພາບຈາກ: ຄຳມ່ວນຊວນຊົມ

    LEAVE A REPLY

    Please enter your comment!
    Please enter your name here