ຕິດຕາມຄ່າມາດຕະຖານຝຸ່ນ PM 2.5 ຢູ່ປະເທດເຮົາລວມທັງເຂດໂນນສະອາດ

    0
    161

    ຈາກເຫດການໄຟໄໝ້ສະໜາມຂີ້ເຫຍື້ອເຫຼັກ 32 ຢູ່ບ້ານນາຜາສຸກ ເມືອງໄຊທານີ ນະຄອນຫຼວງວຽງຈັນ ໃນວັນທີ 29-31 ມັງກອນ 2022 ຜ່ານມາ ໄດ້ເຮັດໃຫ້ມີໝອກຄວັນປົກຄຸມເປັນບໍລິເວນກວ້າງ, ຫຼັງຈາກນັ້ນເຈົ້າໜ້າທີ່ເຂົ້າດັບມອດໄຟໄດ້ແລ້ວ ແລະ ມາຮອດວັນທີ 3 ກຸມພານີ້ ຈາກການວັດແທກຝຸ່ນລະອອງ PM 2.5 ຈຸດບ້ານໂນນສະອາດ ເຊິ່ງເປັນເຂດໃກ້ຄຽງກັນຄ່າ PM 2.5 ແມ່ນຍັງຢູ່ໃນຄ່າມາດຕະຖານ.

    ຈາກການລາຍງານສະພາບຜົນການວັດແທກຝຸ່ນລະອອງຂະໜາດນ້ອຍກວ່າ 2.5 ໄມຄຣອນ (PM 2.5) ຂອງສະຖານີວັດແທກຝຸ່ນລະອອງ PM 2.5 ຂອງສະຖາບັນຄົ້ນຄວ້າ ຊັບພະຍາກອນທໍາມະຊາດ ແລະ ສິ່ງແວດລ້ອມ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ວ່າ: ຜົນການວັດແທກຝຸ່ນລະອອງ PM 2.5 ເລີ່ມແຕ່ເວລາ 7 ໂມງເຊົ້າ ຂອງວັນທີ 2 ກຸມພາ ຫາ ເວລາ 7 ໂມງເຊົ້າຂອງວັນທີ 3 ກຸມພາ 2022 ຢູ່ຈຸດບ້ານໂນນສະອາດ ເມືອງໄຊທານີ ວັດແທກຝຸ່ນລະອອງ PM 2.5 ໄດ້ 43,9 µg/m3/24h ເຊິ່ງຍັງຢູ່ໃນຄ່າມາດຕະຖານ ( 50 µg/m3/24h ) ແລະ ດັດຊະນີຄຸນນະພາບອາກາດ ຢູ່ທີ 75 AQI ຈັດຢູ່ໃນດີປານກາງ.

    ສ່ວນຢູ່ບ້ານອາກາດ ວັດແທກໄດ້ 15,5 µg/m3, ບ້ານ ຊຽງຍືນ (ສວນເຈົ້າອານຸວົງ) 13,4 µg/m3, ບ້ານ ພູຊ້າງຄໍາ (ສະໜາມບິນ ຫຼວງພະບາງ) 51,6 µg/m3 ເກີນຄ່າມາດຕະຖານເລັກໜ້ອຍ, ບ້ານ ດອນໄຊ (ພຊສ ແຂວງ ອຸດົມໄຊ) 34,2 µg/m3, ບ້ານ ນາລື (ພຊສ ແຂວງ ຫຼວງນໍ້າທາ) 14,2 µg/m3, ບ້ານ ອຸດົມ (ສະໜາມບິນ ແຂວງ ບໍ່ແກ້ວ) 22,9 µg/m3 ແລະ ບ້ານ ໄຊຍະມຸງຄຸນ (ອຸຕຸນິຍົມ ແຂວງ ສະຫວັນນະເຂດ) 9 µg/m3.

    ຕາຕະລາງ 1: ຜົນການວັດແທກຝຸ່ນລະອອງ ທີ່ມີຂະໜາດນ້ອຍກວ່າ 2.5 ໄມຄຣອນ (PM 2.5) ເລີ່ມແຕ່ເວລາ 7 ໂມງເຊົ້າຂອງວັນທີ 2 ກຸມພາ ຫາ ເວລາ 7 ໂມງເຊົ້າ ຂອງວັນທີ 3 ກຸມພາ 2022

    LEAVE A REPLY

    Please enter your comment!
    Please enter your name here