ໄຊຍະບູລີ ເລີ່ມສ້າງໂຮງໝໍເອກະຊົນແຫ່ງທຳອິດຂອງແຂວງ

    0
    96

    ໂຮງໝໍ ເປັນສະຖານທີ່ທີ່ປະຊາຊົນໄວ້ວາງໃຈ ສຳລັບການປິ່ນປົວພະຍາດຕ່າງໆ ແຕ່ຖ້າຍິ່ງເປັນໂຮງໝໍທີ່ໄດ້ມາດຕະຖານ ຫຼື ທັນສະໄໝກໍ່ຍິ່ງສ້າງຄວາມຫວັງໃຫ້ແກ່ຜູ້ປ່ວຍ ເຊິ່ງບ້ານເຮົາສ່ວນໃຫຍ່ແມ່ນໄປໃຊ້ບໍລິການໂຮງໝໍລັດແຕ່ບາງຄັ້ງກໍ່ບໍ່ສາມາດຕອບສະໜອງໄດ້ຕາມຄວາມຕ້ອງການເນື່ອງຈາກຈຳນວນຜູ້ປ່ວຍຫຼາຍ ສະນັ້ນ ການເປີດໃຫ້ບໍລິການໂຮງໝໍເອກະຊົນຈະເປັນທາງເລືອກ ແລະເປັນກຳລັງແຮງສຳຄັນຊ່ວຍເຫຼືອແພດໝໍໃຫ້ວຽກງານເບົາບາງລົງ ເຊິ່ງແຂວງໄຊຍະບູລີແມ່ນກຳລັງຈະມີໂຮງໝໍເອກະຊົນເປັນແຫ່ງທຳອິດ.

    ພິທີວາງສີລາລຶກ ການກໍ່ສ້າງໂຮງໝໍໄຊຍະເວດ ຈໍາກັດຜູ້ດຽວ ໄດ້ຈັດຂຶ້ນໃນຕອນແລງຂອງວັນທີ 2 ກຸມພາ 2022 ນີ້ ທີ່ບ້ານສີເມືອງ ເມືອງໄຊຍະບູລີ ໂດຍການເປັນກຽດເຂົ້າຮ່ວມຂອງ ທ່ານ ປອ ດຣ ບຸນແຝງ ພູມມະໄລສີ ລັດຖະມົນຕີກະຊວງສາທາລະນະສຸກ, ທ່ານ ເພັງນິລັນ ຄໍາພັນເພັງ ຮອງເລຂາພັກແຂວງ ປະທານປະຊາຊົນ ແຂວງໄຊຍະບູລີ, ທ່ານ ດວງຕາ ໄຊວຸດ ຮອງເລຂາພັກແຂວງ ໄຊຍະບູລີ, ມີຮອງເຈົ້າແຂວງ ກໍາມະການປະຈໍາພັກແຂວງ,ກໍາມະການພັກແຂວງ, ຫົວໜ້າກົມ, ຮອງກົມ ຈາກກະຊວງສາທາລະນະສຸກ, ຫົວໜ້າພະແນກ, ຮອງພະແນກການທີ່ກ່ຽວຂ້ອງ, ບັນດາຄະນະອາຈານ, ຊ່ຽວຊານທາງການເພດ, ຄອບຄົວການນໍາ, ອາດີດການນໍາຂອງແຂວງ, ເມືອງ ເຂົ້າຮ່ວມ.

    ທ່ານ ດຣ ສຸກຄໍາພີ ບຸນຍາວົງ ຜູ້ລົງທຶນ ແລະ ອໍານວຍການໂຮງໝໍໄຊຍະເວດ ຈໍາກັດຜູ້ດຽວກ່າວວ່າ: ໂຮງໝໍໄຊຍະເວດແມ່ນການລົງທຶນພາກໂຮງໝໍເອກະຊົນແຫ່ງທໍາອິດຂອງແຂວງໄຊຍະບູລີ ມູນຄ່າການລົງທຶນທັງໝົດ 15 ຕື້ກີບ ເປັນໂຮງໝໍຂະໜາດ 45 ຕຽງນອນ ( ລວມທັງຕຽງໄອຊີຢູ ) ຕັ້ງຢູ່ໃຈກາງເມືອງໄຊຍະບູລີ ໃນເນື້ອທີ່ທັງໝົດ 5 ພັນຕາເມັດ ເປັນການລົງທຶນຂອງເອກະຊົນພາຍໃນ ໂດຍ ທ່ານ ດຣ ສຸກຄໍາພີ ບຸນຍາວົງ ເປັນຜູ້ລົງທຶນ ແລະ ຖືຮຸ້ນ 100% ແບ່ງເປັນມູນຄ່າການກໍ່ສ້າງອາຄານ ຢ່າງເປັນລະບົບຄົບຊຸດ 6,4 ຕື້ກີບ

    ເຊິ່ງປະກອບມີ 4 ຕຶກຄື. ຕຶກສອງຊັ້ນສໍາລັບບໍລິການຄົນເຈັບ 1 ຕຶກ, ຕຶກຊັ້ນດຽວ ເປັນຮ້ານອາຫານ ຮ້ານກາເຟ ແລະ ຊຸບເປີມາເກັດ 1 ຕຶກ ແລະ ຊັ້ນດຽວເປັນສາງເກັບຢາ, ຫ້ອງຊັກລີດ ແລະ ຫ້ອງເຢັນ ໂດຍປະກອບມີ 9 ຂະແໜງຄື: ຂະແໜງສຸກເສີນ, ຂະແໜງກວດເຂດນອກ, ຂະແໜງໄອຊີຢູຟື້ນຟູຊີບ ແລະ ວາງຢາສະຫຼົບ, ຂະແໜງພາຍນອກຜ່າຕັດ, ຂະແໜງພາຍໃນ, ຂະແໜງອອກລູກ – ພະຍາດຍິງ, ຂະແໜງເດັກນ້ອຍ, ຂະແໜງການຢາ ແລະ ຂະແໜງເອໂກ້ – ຮູບພາບລັງສີ, ກໍານົດເວລາການກໍ່ສ້າງອາຄານ 18 ເດືອນໃຫ້ສໍາເລັດສົມບູນ.

    ຈາກນັ້ນ ທ່ານ ເພັງນິລັນ ຄໍາພັນເພັງ ຮອງເລຂາພັກແຂວງ ປະທານສະພາປະຊາຊົນແຂວງ ໄດ້ກ່າວວ່າ ໂຮງໝໍແຫ່ງນີ້ຈະຊ່ວຍຕອບສະໜອງໃຫ້ແກ່ການບໍລິການດ້ານການປິ່ນປົວ ທີ່ທັນສະໄໝ ແລະ ຊັດເຈນຫຼຸດຜ່ອນອັດຕາການແອອັດ, ຫຼຸດຜ່ອນຄວາມສ່ຽງໃນການປິ່ນປົ່ວຕາມຂັ້ນຕອນມາດຕະຖານ ແລະ ທັນເວລາໃຫ້ກັບພໍ່ – ແມ່ປະຊາຊົນພາຍໃນ ແຂວງໄຊຍະບູລີ ແລະແຂວງອ້ອມຂ້າງ, ເປັນທາງເລືອກໃນການເຂົ້າໃຊ້ບໍລິການຂອງຄົນເຈັບ ດ້ວຍມາດຕະຖານການແພດທີ່ທັນສະໄໝ ມີຄວາມວ່ອງໄວ -ຊັດເຈນ ດ້ວຍທິມແພດທີ່ມີປະສົບການສູງ ເປັນແພດຊ່ຽວຊານ ສະເພາະດ້ານ ແລະໃຫ້ການບໍລິການທີ່ດີ ຢູ່ໃນລາຄາທີ່ສົມເຫດສົມຜົນ.

    LEAVE A REPLY

    Please enter your comment!
    Please enter your name here