ປກສ ເມືອງຫາດຊາຍຟອງ ມ້າງຄະດີສໍ້ໂກງຊັບ ລົດໃຫຍ່ເສຍຫາຍຫຼາຍຄັນ.

    0
    100

    ປກສ ເມືອງຫາດຊາຍຟອງ ມ້າງຄະດີສໍ້ໂກງຊັບລົດໃຫຍ່ເສຍຫາຍຫຼາຍຄັນ.

    ເຈົ້າໜ້າທີ່ ປກສ ເມືອງ ຫາດຊາຍຟອງ ນະຄອນຫຼວງວຽງຈັນ ມ້າງຄະດີຍັກຍອກຊັບ, ສໍ້ໂກງຊັບ ແລະ ຊຸກເຊື່ອງຄ້າຂາຍຊັບຜິດກົດໝາຍ ( ລົດໃຫຍ່ ) ຈັບຜູ້ຖືກຫາໄດ້ 1 ຄົນ ກວດພົບລົດໃຫຍ່ຖືກຍັກຍອກ 40 ຄັນ, ມີຜູ້ເສຍຫາຍເຂົ້າແຈ້ງ ຄວາມກັບເຈົ້າໜ້າທີ່ແລ້ວ 21 ຄົນ, ເກັບກູ້ລົດໃຫຍ່ໄດ້ແລ້ວ 23 ຄັນ, ເຈົ້າໜ້າທີ່ກຳລັງ ເລັ່ງຂະຫຍາຍຜົນຫາຜູ້ຮ່ວມຂະບວນການ.
    ພັທ ທັດສະພົງ ຫວັນມະນີຈັນ ຮອງຫົວໜ້າກອງບັນຊາການ ປກສ ເມືອງຫາດຊາຍຟອງ ໃຫ້ຮູ້ໃນວັນທີ 17 ມັງກອນ 2022 ວ່າ: ພາຍຫຼັງໄດ້ຮັບຄຳຮ້ອງຟ້ອງຈາກ ທ້າວ ວົງກົດ ອາຍຸ 29 ປີ ອາຊີບພະນັກງານຢູ່ບ້ານດ່ານຊ້າງ ເມືອງໄຊທານີ ນະຄອນຫຼວງວຽງຈັນ ວ່າ: ທ້າວ ທົງໄຊ ( ເບີດ ) ອາຍຸ 35 ປີ ອາຊີບຄ້າຂາຍຢູ່ບ້ານທ່ານາ ເມືອງຫາດຊາຍຟອງ ຍັກຍອກລົດໃຫຍ່ໂຕໂຢຕ້າ ຟໍຈູນເນີ ໝາຍເລກທະບຽນ 7777 ກຳແພງນະຄອນ.
    ຈາກນັ້ນ, ຄະນະກອງບັນຊາການ ປກສ ເມືອງ ຈິ່ງໄດ້ແຕ່ງຕັ້ງເຈົ້າໜ້າທີ່ວິຊາສະເພາະ ລົງເຄື່ອນໄຫວສືບສວນ ເພື່ອເກັບກຳຂໍ້ມູນ, ຜ່ານການເກັບກໍາຂໍ້ມູນເຫັນວ່າ ມີຂໍ້ມູນຄວາມຈິງ ຈິ່ງໄດ້ເຮັດໝາຍຮຽກ ທ້າວ ທົງໄຊ ມາສອບສວນ, ແຕ່ຜູ້ກ່ຽວບໍ່ມາຕາມໝາຍຮຽກ ຈິ່ງດຳເນີນການຈັບຕົວໃນວັນທີ 18 ທັນວາ 2021 ມາສອບສວນ.
    ທ້າວ ທົງໄຊ ສາລະພາບໃນເບື້ອງຕົ້ນວ່າ: ໄດ້ເຄື່ອນໄຫວກໍ່ເຫດຍັກຍອກ, ສໍ້ໂກງລົດໃຫຍ່ຈຳນວນ ຫຼາຍສິບຄັນ ຕັ້ງແຕ່ເດືອນມີນາ 2021 ເປັນຕົ້ນມາ ໂດຍໄດ້ໃຊ້ຮູບການວິທີການປະກາດໂຄສະນາຜ່ານທາງສື່ອອນລາຍຮັບເຊົ່າ ແລະ ຮັບຊວດຈຳລົດໃຫຍ່ໂດຍໃຫ້ຄ່າເຊົ່າລາຄາສູງ ເມື່ອໄດ້ລົດມາກໍໄດ້ນຳໄປຂາຍຕໍ່ໂດຍໄດ້ເຄື່ອນໄຫວຮ່ວມກັບໝູ່ 2 ຄົນທີ່ ຄື: ທ້າວ ລໍາເລີ ອາຍຸ 32 ປີ ອາຊີບຄ້າຂາຍຢູ່ບ້ານແກ້ວກຸ່ ເມືອງແກ້ວອຸດົມ ແຂວງວຽງຈັນ ແລະ ນາງ ຈັນໄດ ອາຍຸ 31 ປີ ຢູ່ບ້ານທາງໂຄ້ງ ເມືອງປາກງື່ມ ນະຄອນຫຼວງວຽງຈັນ ( ຜົວເມຍ).
    ມາຮອດປັດຈຸບັນ ມີຜູ້ເສຍຫາຍເຂົ້າມາແຈ້ງຄວາມກັບເຈົ້າໜ້າທີ່ ປກສ ເມືອງຫາດຊາຍຟອງ ແລ້ວຈຳນວນ 21 ຄົນ, ຜົນເສຍຫາຍເປັນປະເພດລົດໃຫຍ່ຈຳນວນ 40 ຄັນຄື: ລົດກະບະ 26 ຄັນ, ລົດເກັງ 4 ຄັນ, ກະບະຟອດແຣງເຈີ 3 ຄັນ ແລະ ກະບະນິດສັນ 3 ຄັນ, ລົດເກັງຮຸນໄດ 2 ຄັັນ, ລົດເກັງເກຍ 1 ຄັນ ແລະ ກະບະຮຸນໄດ 1 ຄັນ; ໃນນີ້, ຜູ້ຖືກຫາຮັບຊວດຈຳຈາກຜູ້ເສຍຫາຍແລ້ວເອົາໄປຂາຍຕໍ່ມີຈຳນວນ 5 ຄັນ, ຮັບເຊົ່າໂດຍໃຫ້ຄ່າເຊົ່າສູງແລ້ວເອົາໄປຂາຍຕໍ່ຈຳນວນ 35 ຄັນ. ເຈົ້າໜ້າທີ່ສາມາດເກັບກູ້ມາໄດ້ແລ້ວ ຈຳນວນ 23 ຄັນ ( ຍັງເກັບຮັກສາໄວ້ຢູ່ຫ້ອງ ການ ປກສ ເມືອງຫາດຊາຍຟອງ).
    ເຈົ້າໜ້າທີ່ໃຫ້ຮູ້ອີກວ່າ: ຄະດີດັ່ງກ່າວ ຄາດວ່າ ຍັງມີຜູ້ຮ່ວມຂະບວນການອີກຫຼາຍຄົນ ເຊິ່ງເຈົ້າໜ້າທີ່ກຳລັງເລັ່ງ ສືບສວນ-ສອບສວນຂະຫຍາຍຜົນ.

    LEAVE A REPLY

    Please enter your comment!
    Please enter your name here