ຊຽງໄຮ້ອອກກົດຄວບຄຸມ “ກ່ອງສຸ່ມ” ຫລັງເຄເອຟຊີຖືກໂຈມຕີໜັກ ສ້າງບັນຫາການຊື້ບໍ່ມີເຫດຜົນ

0
104

ຊຽງໄຮ້ອອກແນວທາງຄວບຄຸມ “ກ່ອງສຸ່ມ” ເຊິ່ງກຳລັງໄດ້ຮັບຄວາມນິຍົມໃນໄວໜຸ່ມ ກຳນົດລາຄາຕ້ອງບໍ່ເກີນ 200 ຢວນ, ຫ້າມຂາຍໃຫ້ເດັກຕໍ່າກວ່າ 8 ປີ ແລະ ເກັງກຳໄລຫລາຍເກີນຄວນ.

ວັນທີ 17 ມັງກອນ 2022, ສຳນັກຂ່າວຊິນຮົວ ສື່ທາງການຈີນ ລາຍງານວ່າ: ສຳນັກບໍລິຫານການຄວບຄຸມຕະຫລາດຂອງນະຄອນຊຽງໄຮ້ ໄດ້ປະກາດແນວທາງປະຕິບັດເພື່ອຄວບຄຸມຕະຫລາດ “ກ່ອງສຸ່ມ” ໃນເມືອງ ເຊິ່ງກຳລັງນິຍົມຫລາຍໃນໄວໜຸ່ມ.ແນວທາງປະຕິບັດດັ່ງກ່າວກຳນົດໃຫ້ລາຄາກ່ອງສຸ່ມທຸກປະເພດຕ້ອງບໍ່ເກີນ 200 ຢວນ ແລະ ຜູ້ຂາຍບໍ່ຄວນຂາຍກ່ອງສຸ່ມເຫລົ່ານີ້ໃຫ້ເດັກອາຍຸຕໍ່າກວ່າ 8 ປີ ຫລື ສ້າງການຕະຫລາດ ແລະ ເກັງກຳໄລຫລາຍເກີນຄວນ.

ດ້ານປ໊ອບ ມາຣ໌ຕ (Pop Mart) ເຊິ່ງເປັນຍັກໃຫຍ່ດ້ານກ່ອງສຸ່ມ ໄດ້ອອກມາສະແດງຄວາມຄິດເຫັນສະໜັບສະໜູນຕໍ່ແນວທາງປະຕິບັດດັ່ງກ່າວ ແລະ ພ້ອມຈະຮ່ວມມືກັບທາງການ ເພື່ອຊອກຫາແຜນການຕະຫລາດທີ່ເໝາະສົມ.ການເຄື່ອນໄຫວຄັ້ງນີ້ເກີດຂຶ້ນຫລັງຈາກສະມາຄົມຜູ້ບໍລິໂພກແຫ່ງປະເທດຈີນ (CCA) ອອກຖະແຫລງການໂຈມຕີ ຊຸດອາຫານທີ່ຫາກໍເປີດຕົວຂອງຮ້ານເຄເອຟຊີ (KFC ເຊິ່ງມອບກ່ອງສຸ່ມຂອງຂວັນລຸ້ນພິເສດ ໄດ້ກໍ່ໃຫ້ເກີດບັນຫາການຊື້ອາຫານແບບບໍ່ມີເຫດຜົນ ແລະ ຫລາຍເກີນຈຳເປັນ.

ສະມາຄົມດັ່ງກ່າວ ຊີ້ວ່າ: ກົນລະຍຸດວິທີການຂາຍດັ່ງກ່າວຂັດຕໍ່ຄວາມສະຫງົບຮຽບຮ້ອຍ ແລະ ຂະໜົບທຳນຽມທີ່ດີຂອງປະຊາຊົນ ແລະ ລະເມີດເຈດຕະນາຂອງກົດໝາຍ.