ອົງການອະນາໄມໂລກເຕືອນ ປະຊາຊົນເອີຣົບ 50% ຈະຕິດໂອໄມຄຣອນ ໃນອີກ 6 ອາທິດຂ້າງໜ້າ

0
150

ອົງການອະນາໄມໂລກ (WHO) ອອກມາເຕືອນ ປະຊາຊົນເອີຮົບເຄິ່ງໜຶ່ງຈະຕິດເຊື້ອໂຄວິດສາຍພັນໂອໄມຄຣອນ ພາຍໃນອີກ 6 ອາທິດຂ້າງໜ້າ ແລະ ເປັນການລະບາດທີ່ໜັກຈາກທາງຕາເວັນຕົກໄປຕາເວັນອອກ.

ໃນວັນທີ 12 ມັງກອນ 2022 ສຳນັກຂ່າວ BBC ໄດ້ລາຍງານວ່າ: ດຣ. ຫັນ ຄູດ (Hans Kluge) ຜູ້ອຳນວຍການອົງການອະນາໄມໂລກ (WHO) ປະຈຳພາກພຶ້ນເອີຣົບ ໄດ້ອອກມາເຕືອນໃນວັນອັງຄານ ວັນທີ 11 ມັງກອນ 2022 ທີ່ຜ່ານມາວ່າ: ເຊື້ອໂຄວິດ-19 ສາຍພັນໂອໄມຄຣອນ ກຳລັງລະບາດໄປທົ່ວທຸກພຶ້ນທີ່ຢ່າງໜັກຄ້າຍຄືກັບສາຍພັນເດລຕາ ໂດຍນຳຂໍ້ມູນມາຈາກສະຖາບັນປະເມີນ ສຸຂະພາບ (Institute for Health Metrics and Evaluation) ເຊິ່ງຄາດການໄວ້ວ່າ: ປະຊາຊົນເອີຣົບກວ່າ 50% ຈະຕິດເຊື້ອພາຍໃນ 6-8 ອາທິດຂ້າງໜ້າ.

ທັງນີ້ຜົນການວິໄຈຫຼ້າສຸດ, ກ່ຽວກັບໂຄວິດ-19 ສາຍພັນໂອໄມຄຣອນເຫັນວ່າ: ສາຍພັນນີ້ ມີໂອກາດເຮັດໃຫ້ ຜູ້ຕິດເຊຶ້ອບໍ່ປ່ວຍໜັກເທົ່າສາຍພັນກ່ອນໆ ແຕ່ມີປະສິດທິພາບສູງໃນການຕິດຕໍ່ໄດ້ໄວ ແມ້ແຕ່ກຸ່ມຜູ້ທີ່ໄດ້ຮັບວັກຊີນແລ້ວ ເຊັ່ນ: ພົບຜູ້ຕິດເຊື້ອເພີ່ມຂຶ້ນໃນປະເທດອັງກິດກວ່າ 142,224 ຄົນ ແລະ ເສຍຊີວິດ 77 ຄົນໃນມື້ດຽວ ໂດຍໂຮງໝໍຫຼາຍແຫ່ງຕ້ອງປະກາດເປັນສະຖານະການສຸກເສີນ ເນື່ອງຈາກວ່າຂາດພະນັກງານ ແລະ ຈຳນວນຜູ້ປ່ວຍທີ່ເພີ່ມຂຶ້ນຢ່າງໄວ.