ອົງການກວດກາແຫ່ງລັດ ກວດສອບ 650 ເປົ້າໝາຍເສຍຫາຍຫຼາຍສິບຕື້ກີບ ໃນປີ 2020

0
64

ປີ 2020 ຜ່ານມາ, ອົງການກວດກາແຫ່ງລັດ ແລະອົງການຕ້ານການສໍ້ລາດບັງຫຼວງສາມາດກວດສອບກຸ່ມທຸຈະລິດໄດ້ 650 ເປົ້າໝາຍ, ພົບເຫັນຜົນເສຍຫາຍ 1.562 ຕື້ກວ່າກີບ ແລະ 147.387 ໂດລາສະຫະລັດ ໃນນັ້ນ ເກັບກູ້ຄືນໄດ້ພຽງແຕ່ 32 ຕື້ກວ່າກີບ ແລະ 116.896 ໂດລາສະຫະລັດ ພ້ອມດິນ 19 ຕອນ.

ເຈົ້າໜ້າທີ່ຍັງໄດ້ກວດສອບໂຮງງານປຸງແຕ່ງໄມ້ທີ່ສ້າງຕັ້ງບໍ່ຖືກຕ້ອງຈຳນວນ 2.788 ແຫ່ງ, ໃນນີ້ໄດ້ຍຸບເລີກແລ້ວ 1.636 ແຫ່ງ ພ້ອມຕິດຕາມກວດກາການປະຕິບັດຄໍາສັ່ງເລກທີ 15/ນຍ, ຢຶດໄມ້ໄດ້ 2.605 ແມັດກ້ອນ ແລະ 290,96 ໂຕນ ຂາຍແລ້ວ 2.073 ແມັດກ້ອນ ແລະ 0,59 ໂຕນ ລວມມູນຄ່າ 5,8 ຕື້ກວ່າກີບ ມອບເຂົ້າງົບປະມານແລ້ວ 2,9 ຕື້ກີບ, ຄ້າງ ມອບ 2,99 ຕື້ກີບ, ມີຜູ້ກະທໍາຜິດ 25 ຄົນ.

ສຳລັບວຽກຕ້ານ ແລະສອບສວນການສໍ້ລາດບັງຫຼວງ ໃນປີ 2020 ໄດ້ດຳເນີນຄະດີສໍ້ລາດບັງຫຼງງທັງໝົດ 5 ລາຍ ໃນນັ້ນມີຜູ້ຖືກດຳເນີນຄະດີ 24 ຄົນ ເຊິ່ງ 16 ຄົນແມ່ນເປັນພະນັກງານລັດ, ມູນຄ່າເສຍຫາຍ 208 ຕື້ກວ່າກີບ, 331 ລ້ານກວ່າບາດ, ແລະ 14,3 ລ້ານໂດລາສະຫະລັດ ເຊິ່ງສາມາດເກັບກູ້ຄືນໄດ້ຈຳນວນໜຶ່ງ.

ຂໍ້ມູນຈາກ: ໜັງສືພິມ ເສດຖະກິດ-ສັງຄົມ